Beynəlxalq Universitetlərarası Proqramlaşdırma Müsabiqəsinin (ICPC) 49-cu dünya finalı bu gün Bakıda start götürdü. Dünyanın ən nüfuzlu proqramlaşdırma yarışlarından biri hesab olunan müsabiqənin finalı “ICPC Foundation” təşkilatçılığı və ADA Universitetinin ev sahibliyi, Azərbaycan Respublikasının Mərkəzi Bankının tərəfdaşlığı, İnovasiya və Rəqəmsal İnkişaf Agentliyi ilə “ICPC Azərbaycan” icmasının birgə əməkdaşlığı, PAŞA Holding-in dəstəyi ilə keçirilir. 

1 sentyabr tarixində sözügedən müsabiqənin açılış mərasimi keçirildi. Tədbirdə açılış nitqi ilə çıxış edən ICPC Fondunun prezidenti Vilyam B.Pouçer müsabiqənin finalının Bakıda keçirilməsindən böyük məmnunluq duyduğunu qeyd edib. Daha sonra 49-cu ICPC Dünya Finalının direktoru Fuad Hacıyev çıxış edərək müsabiqə iştirakçılarına müvəffəqiyyətlər arzulayıb.

Daha sonra ADA Universitetinin rektoru Hafiz Paşayev tədbirdə çıxış edərək öz fikirlərini bölüşüb:

“ICPC Dünya Finalına ev sahibliyi etmək bu yolda atılmış mühüm addımdır. Əminik ki, bu tədbir ölkəmizdə IT sahəsinin inkişafında bir dönüş nöqtəsinə çevriləcək və Azərbaycanın beynəlxalq arenada diqqət mərkəzinə düşməsinə töhfə verəcək”.

Tədbirin davamında Mərkəzi Bankın sədri Taleh Kazımov çıxış edərək bildirib ki, gənclər ICPC kimi qlobal əhəmiyyətli tədbirdə qazandıqları bilik və təcrübələri ölkənin texnoloji gələcəyinin formalaşdırılmasına yönəldəcək, maliyyə sektorunun mürəkkəb çağırışlarını həllinə töhfə verəcəklər.

Tədbir rəqəmsal inkişaf və nəqliyyat nazirinin müavini Samir Məmmədovun çıxışı ilə davam edib. Nazir müavini paytaxtımızda 49-cu ICPC Dünya Finalının keçirilməsinin qürurverici bir hadisə olduğunu qeyd edərək müsabiqənin əhəmiyyətindən danışıb:

 “Bu tədbir yalnız yarışma deyil, eyni zamanda dünyanın ən istedadlı gənc beyinlərinin toplaşdığı məkandır. Onlar burada sadəcə yarışmır, həm də bir-birlərindən öyrənir, təcrübələrini bölüşür və yeni ideyaların yaranmasına təkan verirlər”’.

Qeyd edək ki, bu il Azərbaycan tarixində ilk dəfə olaraq dünya finalında iki komanda ilə təmsil olunur. İndiyə qədər ölkəmizi yalnız bir komanda iştirak hüququ qazanaraq finalda təmsil edirdi, lakin bu il ADA Universitetinin və Bakı Ali Neft Məktəbinin (BANM) komandaları dünya finalında yarışır.

Müsabiqədə dünyanın müxtəlif ölkələrindən aparıcı universitetlərin ən güclü komandaları iştirak edir. Ümumilikdə, ICPC-nin rəsmi mərhələlərində hər il 110-dan çox ölkədən, 3500-ə yaxın universiteti təmsil edən 50,000-dən çox tələbə-proqramçı mübarizə aparır. Dünya finalında isə 70 ölkədən 140 ali təhsil müəssisəsini təmsil edən komandalar (hər komandada 3 tələbə olmaqla) iştirak edir.

Xatırladaq ki, bu nüfuzlu yarış ilk dəfə keçən əsrin 70-ci illərində ABŞ-da təşkil olunub və zamanla beynəlxalq səviyyədə tanınaraq ali təhsil müəssisələrinin tələbələri arasında proqramlaşdırma və problemhəll etmə bacarıqlarını sınayan ən böyük tədbirlərdən birinə çevrilib. ICPC Dünya Finalı hər il müxtəlif ölkələrdə keçirilir və təşkilatçı ölkələr üçün beynəlxalq imic baxımından böyük imkanlar yaradır.

2024-cü ildən başlayaraq İRİA ADA Universiteti və ICPC Azərbaycan icması ilə birgə əməkdaşlıq çərçivəsində ICPC proqramlaşdırma müsabiqəsinə hazırlıq proqramına dəstək verir. Əməkdaşlıq çərçivəsində şagird və tələbələr arasında proqramlaşdırma ICPC əsaslı olimpiada, 49-cu "ICPC" proqramlaşdırma müsabiqəsinin Azərbaycan üzrə 1/8, ¼ və yarımfinal mərhələləri, "ICPC" əsaslı beynəlxalq proqramlaşdırma təlim düşərgəsi keçirilib, həmçinin cari ildə “ICPC Foundation” İdarə Heyətinin üzvlərinin Bakıya səfəri, Qazaxıstanda təşkil edilən Beynəxalq ICPC düşərgəsində finalçıların iştirakı təşkil edilib.