Neftçala Rayon İcra Hakimiyyətinin  və Azərbaycan Dövlət Su Ehtiyatları Agentliyi Regional Su Meliorasiya Xidməti Publik Hüquqi Şəxs Neftçala Su Meliorasiya Sistemləri İstismarı idarəsinin birgə təşkilatçılığı ilə Neftçala şəhərində, Neftçala Su Meliorasiya Sistemləri İstismarı idarəsinin, Aşağı Muğan Meliorativ Sistemlərinin İstismarı idarəsinin əməkdaşlarının, Sudan İstifadəedənlər Birliklərinin, Neftçala Dövlət Aqrar İnkişaf Mərkəzinin, Rayon Elektrik Şəbəkəsinin rəhbərlərinin iştirakı ilə Su təsərrüfatı və meliorasiya işçiləri günü qeyd olunub.
 
Tədbir iştirakçıları Neftçala şəhərində ucaldılan Azərbaycan xalqının ümummilli lideri Heydər Əliyevin abidəsini ziyarət etməklə meliorasiya sahəsinin inkişafında müstəsna xidmətləri olan dahi şəxsiyyətə ehtiramlarını bildirib və önünə gül dəstələri düzüblər. Daha sonra Neftçala Şəhidlər Memorial Kompleksi ziyarət olunub, şəhidlərin xatirə lövhələrinin önünə gül dəstələri qoyulub. 
 
Tədbir açıq elan edilməzdən öncə Azərbaycan xalqının ümummilli lideri Heydər Əliyevin, Azərbaycan Respublikasının ərazi bütövlüyünün, müstəqilliyinin və konstitusiya quruluşunun müdafiəsi zamanı şəhid olmuş hərbi qulluqçuların ruhu bir dəqiqəlik sükutla yad edilib.
 
Neftçala Rayon İcra Hakimiyyətinin başçısı Mirhəsən Seyidov çıxış edərək, “Su təsərrüfatı və meliorasiya işçiləri günü” münasibətilə melioratorları təbrik edib, hər zaman dövlətimiz tərəfindən meliorasiya işçilərinə diqqət və qayğı ilə yanaşıldığını, xalqımızın Ümummilli Lideri Heydər Əliyev ideyalarının Prezident cənab İlham Əliyev tərəfindən uğurla davam etdirilməsi nəticəsində digər sahələrdə olduğu kimi su təsərrüfatı sektorunda da böyük uğurlar qazanılmasını, əhalinin içməli su təchizatı və əkin sahələrinin suvarma xidmətlərindən istifadəsinin yaxşılaşdırılması məqsədi ilə genişmiqyaslı işlərin görülməsini, təxirəsalınmaz layihələrin həyata keçirilməsini yığıncaq iştirakçılarının diqqətinə çatdırıb. “Meliorasiya və su təsərrüfatı obyektləri bizim sərvətimizdir və bu sərvətdən səmərəli istifadə etməliyik” sözlərini tarixə yazmış ulu öndər Heydər Əliyevin Azərbaycanın kənd təsərrüfatının inkişafında böyük əhəmiyyət kəsb edən meliorasiya və su təsərrüfatı kompleksinin yaradıcısı, müəllifi və təşkilatçısı olması barədə ətraflı məlumat verərək, su təsərrüfatı və meliorasiya sahəsində fədakarlıq göstərən əməkdaşlara gələcək fəaliyyətlərində uğurlar arzulayıb.
 
Neftçala Su Meliorasiya Sistemləri İstismarı idarəsinin rəisi Təbriz Eyyubov çıxış edərək ilk növbədə tədbirdə iştirak edən qonaqları salamlayıb, Azərbaycan Dövlət Su Ehtiyatları Agentliyinin sədri Zaur Mikayılovun “Su təsərrüfatı və meliorasiya işçiləri günü” peşə bayramı münasibəti ilə təbriklərini kollektivin diqqətinə çatdırıb, onlara bu çətin və şərəfli işlərində uğurlar arzu edib.
 
Neftçala Dövlət Aqrar İnkişaf Mərkəzinin direktoru vəzifəsini icra edən Elsevər Əsədov,  Neftçala Su Meliorasiya Sistemləri İstismarı idarəsində uzun illər çalışmış, təqaüdçü Elçin Əsədov və digər şəxslər çıxış edərək, 5 iyun gününün “Su təsərrüfatı və meliorasiya işçiləri günü” peşə bayramı kimi qeyd olunması barədə Prezident İlham Əliyev 14 may 2014-cü il tarixli Sərəncamının su təsərrüfatı və meliorasiya işçilərinin şərəfli əməyinə verilən yüksək dəyərin təzahüründən, meliorasiya və irriqasiya sahəsində görülən geniş miqyaslı işlərdən söhbət açaraq ətraflı məlumatlar verdilər.
 
Tədbirin sonunda rayonun meliorasiya sahəsində əldə etdikləri nailiyyətlərə, habelə su təsərrüfatı və meliorasiya sahəsində xidmətlərinə və səmərəli fəaliyyətlərinə görə fərqlənən bir qrup əməkdaşa Rayon İcra Hakimiyyəti başçısının fəxri fərmanı, Azərbaycan Dövlət Su Ehtiyatları Agentliyi Regional Su Meliorasiya Xidməti Publik Hüquqi Şəxsin rəhbərinin təşəkkürnamələri, Neftçala Su Meliorasiya Sistemləri İstismarı idarəsinin fəxri fərmanı təqdim edilib.