Sağlam qidalanmaya yanlış yanaşma depressiya da daxil olmaqla gözlənilməz nəticələrə səbəb ola bilər.

Liderxeber.az "Abzats" nəşrinə istinadən xəbər verir ki, bu barədə rusiyalı həkim-diyetoloq Yelena Solomatina danışıb.

Onun sözlərinə görə, rasion balanssız olduqda hətta sağlam qidalar belə hər zaman faydalı olmur.

"Əgər rasionda qida lifləri çatışmırsa, hətta super sağlam hesab olunan balıq, kəsmik və ya kefir belə depressiyaya səbəb ola bilər. Çünki faydalı bakteriyalar ac qaldıqda çoxala bilmir", - deyə o bildirib.

Mütəxəssisin sözlərinə görə, əsas səbəb bağırsaq mikroflorasının vəziyyətində gizlənir. Faydalı bakteriyalar lifə ehtiyac duyur. Lif çatışmadıqda onlar zəifləyir və bu, orqanizmdə iltihabi proseslərin yaranmasına səbəb ola bilər. Bu isə öz növbəsində beyin fəaliyyətinə mənfi təsir göstərir.

Yelena Solomatina əlavə edib ki, şəkərli və emal olunmuş qidaların həddindən artıq qəbulu zərərli bakteriyaların çoxalmasına səbəb olur. Bu bakteriyalar orqanizmin normal fəaliyyətinə mane olur, maddələr mübadiləsini və əhvali-ruhiyyəyə təsir edən vacib maddələrin ifrazını pozur. Nəticədə insan zahirən "düzgün" görünən qidalanmaya baxmayaraq, psixoemosional vəziyyətinin pisləşməsi ilə qarşılaşa bilər.