Azərbaycan xalqı 20 Yanvar faciəsinin 35-ci ildönümünü qeyd edir.

Liderxeber.az-ın məlumatına görə, yanvarın 20-də səhər saatlarından Şəhidlər Xiyabanına ziyarət başlayıb.

1990-cı il yanvarın 19-dan 20-nə keçən gecə birbaşa Sovet İttifaqı Kommunist Partiyası Mərkəzi Komitəsinin baş katibi Mixail Qorbaçovun əmri ilə SSRİ Müdafiə Nazirliyi, Dövlət Təhlükəsizlik Komitəsi və Daxili İşlər Nazirliyinin qoşun hissələri Bakıya və Azərbaycanın bir neçə rayonuna yeridilib, dinc əhali ağır texnikadan və müxtəlif tipli silahlardan atəşə tutularaq kütləvi qətlə yetirilib. Azərbaycan xalqına qarşı törədilmiş bu cinayət, əslində, bəşəriyyətə, humanizmə, insanlığa qarşı həyata keçirilmiş dəhşətli terror aktıdır. Yanvarın 19-dan 20-nə keçən gecə və sonrakı bir neçə gündə Bakıda və Azərbaycanın digər bölgələrində 147 nəfər qəddarcasına öldürüldü, 744 nəfər yaralandı, 800-dən çox insan qanunsuz həbs olundu.

Öldürülənlər və yaralananlar arasında qadınlar və qocalar, hətta uşaqlar da vardı. Onlardan bəziləri ömürlük şikəst oldu. 20 Yanvar faciəsi bəşəriyyətə, insanlığa, humanizmə qarşı törədilmiş terror aktıdır. Qanlı Yanvar hadisələri Azərbaycan xalqının yaddaşında silinməz iz buraxan müstəqillik mübarizəmizin dönüm nöqtəsidir.

Qeyd edək ki, 20 Yanvar şəhidlərinin məzarları arasında baş daşına həlak olması günü 20.01.1990-cı il kimi qeyd olunan dörd naməlum şəxsin də məzarı var. Bunlar 20 Yanvar faciəsinin 35 illik naməlum qəhrəmanlarıdır.