Ermənistanın Baş naziri Nikol Paşinyan Azərbaycanla sülhün əsas prinsipləri haqqında fikirlərini açıqlayıb. 

Liderxeber.az xəbər verir ki, bu barədə o, sosial şəbəkə hesablarında canlı yayım zamanı danışıb.

Paşinyan bildirib ki, sülh sazişinin imzalanması nəticəsində Ermənistan 29 743 kv. km əraziyə malik olmalıdır: 

“Bundan başqa, sərhədin hər iki tərəfində anklavlar və eksklavlar olmamalıdır. Ermənistan və Azərbaycan müvafiq dəqiq ölçülərdə əraziləri mübadilə etməlidir”. 

O vurğulayıb ki, iki dövlət arasında bütün yollar və kommunikasiya xətləri açıq olmalıdır.

Baş nazir həmçinin Azərbaycan və Ermənistanın bir-birinə qarşı heç bir tələb irəli sürməməli olduğunu qeyd edib: “İrəvan və Bakı bir-birinə qarşı heç bir tələb irəli sürməməli və bütün məsələlərdə bir-birini rahat buraxmalıdır. Heç bir tələb, o cümlədən Qarabağ, Girdman, Şirvan, Naxçıvan və ya Qərbi Azərbaycan məntiqini əhatə edən tələblər olmamalıdır”.