Dünyanın ən gözəl dili olan ana dilimiz hər birimiz üçün əzizdir. Ana dilimiz, doğma dilimiz bizim keçmişimiz, bu günümüz, gələcəyimizdir. Obrazlı müqayisə etsək, dilimiz göz nurumuz, idrakımızı işıqlandıran tariximizdir. Bizi biz edən dəyərimizin var olması xalqımızın varlığına, xaqımızın varlığı isə dövlətimizin yaşaması üçün vacibdir.

Bu gün dünyanın ən böyük salonlarında, möhtəşəm kürsülərdə ana dilimiz ən yüksək səviyyədə təmsil olunur. Ümummilli lider Heydər Əliyevin təməlini qoyduğu yol hazırda uğurla davam və inkişaf etdirilir.  Hər birimiz yaxşı bilirik ki,  Ulu Öndər Heydər Əliyev ana dilimizin qorunması üçün ötən əsrin 70-ci illərindən başlayaraq çox böyük xidmətlər göstərmişdir. Dahi şəxsiyyət Azərbaycan SSR-nin 1978-ci il Konstitusiyasında ana dilimizə yüksək dəyər verərək onu Azərbaycan SSR-nın dövlət dili elan edilməsinə nail olması, ölkəmizin yenidən müstəqil olmasından xeyli əvvəl həyata keçirilmiş dahiyanə bir siyasət idi.

Ölkəmiz 1991- ci ildə müstəqilliyini yenidən bərpa etdikdən sonra dilimizin varlığı, statusu haqqında qəbul edilmiş ən əhəmiyyətli sənədlərdən biri də 1995-ci il Konstitusiyamızdır. 2001-ci ildə Ümummilli Lider tərəfindən imzalanan “Dövlət dilinin tətbiqi işinin təkmilləşdirilməsi haqqında” Fərman isə xüsusi tarixi əhəmiyyət daşıyan böyük siyasi hadisə idi. Məhz Ulu Öndər Heydər Əliyevin sayəsində dövlət dilimiz ölkə ərazisində sözün həqiqi mənasında, bərqərar edildi, onun məqsədyönlü siyasəti nəticəsində latın qrafikasına keçid prosesi başa çatdırıldı. 30 sentyabr 2002-ci ildə isə Ulu Öndər tərəfindən “Azərbaycan Respublikasında dövlət  dili  haqqında” Qanun təsdiq olundu.

Bu Qanuna əsasən Azərbaycan Respublikası Azərbaycan dilinin dövlət dili olaraq işlədilməsini öz müstəqil dövlətçiliyinin başlıca əlamətlərindən biri sayır, onun tətbiqi, qorunması və inkişaf etdirilməsi qayğısına qalır, dünya azərbaycanlılarının Azərbaycan dili ilə bağlı milli-mədəni özünüifadə ehtiyaclarının ödənilməsi üçün zəmin yaradır. Ümummilli lider Heydər Əliyevin 2001-ci il avqustun 9-da imzaladığı Sərəncama əsasən isə bu günki tarix - avqustun 1-i ölkəmizdə “Azərbaycan Əlifbası və Azərbaycan Dili Günü” kimi qeyd edilir. Bu gün qürurvericidir ki, dilimizin varlığının, zənginliyinin qorunması yolunda bu gün başda Möhtərəm Prezident cənab İlham Əliyev olmaqla hər bir azərbaycanlı birlik, həmrəylik nümayış etdirir.

Vidadi Həmzəyev
Neftçala rayonu