"Bu gün saat 08:30-da Sumqayıtdan Bakıya yola düşməli olan qatar reysi 10 dəqiqə əvvəlcədən ləğv edilib".

Bununla bağl  Liderxeber.az-a sərnişinlərdən biri şikayət ünvanlayıb.

Sərnişinin sözlərinə görə, bu qərar onları çətin vəziyyətə salıb.

Məsələ ilə bağlı "Azərbaycan Dəmir Yolları" QSC-nin (ADY) Mətbuat Xidmətindən sorğuya cavab olaraq bildirilib ki, pik saatlarda Sumqayıt stansiyasında müşahidə olunan sərnişin sıxlığını nəzərə alaraq, iş günləri Sumqayıtdan Bakıya saat 08:30-da yola düşən ekspres qatar reysinin əvəzinə saat 07:30-a yeni ekspres qatar reysi təyin edilib.

"Bu qərar 08:30 reysinin doluluq göstəricisinin aşağı olması və saat 07:00-08:00 aralığında sərnişin tələbatının yüksək olması ilə əlaqədardır.

Bununla əlaqədar Bakıdan Sumqayıta saat 06:58-də və Sumqayıtdan Bakıya saat 20:30-da yola düşən ekspres qatar reysləri ləğv edilib. Bundan əlavə, Bakı-Sabunçu-Bakı qatarının marşrutu Zabrat-2 stansiyasına qədər uzadılıb (saat 08:42-də Zabrat-2-dən Bakı Dəmiryol Vağzalına və saat 08:10-da Bakı Dəmiryol Vağzalından Zabrat-2 stansiyasına).

Bu dəyişikliklər 17 sentyabr saat 18:00-dan etibarən stansiyalarda və qatarlarda elan olunub. Dünən saat 21:00-dan etibarən isə mobil tətbiq və rəsmi saytda hərəkət cədvəlində də əks olunub".