ABŞ administrasiyası yaxın vaxtlarda İsrailə 50 F-15 qırıcısı da daxil olmaqla 18 milyard dollarlıq silah satışını elan edəcək.

Liderxeber.az xəbər verir ki, bu barədə "The Vaşinqton Post" qəzeti mənbələrinə istinadən məlumat yayıb.

Onların sözlərinə görə, yəhudi dövlətinə silah verilməsinə qarşı çıxan iki nüfuzlu demokrat senator Ağ Evin təzyiqi altında mövqeyini dəyişib. Beləliklə, müqavilənin Konqres tərəfindən bloklanması ehtimalı azdır və bu, ötən ilin oktyabrında Fələstin-İsrail münaqişəsinin kəskinləşməsindən bəri İsrailə ən böyük silah satışlarından biri olacaq.

Silahlar ABŞ-nin yəhudi dövlətinə ayırdığı illik 3,3 milyard dollarlıq hərbi yardım hesabına ödəniləcək. "Politico" qəzetinin məlumatına görə, silah paketinə "hava - hava" raketləri daxil ediləcək.

Bundan əlavə, bəzi KİV-lərin verdiyi məlumata görə, Vaşinqton administrasiyası İsrailə 1,8 min 2 000 funt (907 kq) bomba və 1,7 min 500 funt (təxminən 227 kq) bombadan ibarət bir partiya göndərmək niyyətindədir. Bundan əvvəl Qəzza zolağının cənubundakı Rəfah şəhərində İsrailin genişmiqyaslı əməliyyatı ilə bağlı ABŞ-nin narahatlığı səbəbindən bu silahların tədarükü dayandırılmışdı.