Yaponiyada qida borusu xərçənginin müalicəsi üçün nəzərdə tutulan preparatın kommersiya satışına başlanılıb.

Liderxeber.az "Nikkei" agentliyinə istinadən xəbər verir ki, preparatda xərçəng hüceyrələrinə seçici şəkildə yoluxaraq onları məhv etmək üçün genetik modifikasiya olunmuş viruslardan istifadə edilir. Bu zaman sağlam toxumaların zədələnməməsi hədəflənir.

Preparatı hazırlayan Tokiodakı "Oncolys BioPharma" şirkətinin sözlərinə görə, bu, qida borusu xərçənginin müalicəsi üçün xüsusi olaraq təsdiqlənmiş dünyada ilk onkolitik virus preparatıdır.

Onkolitik viruslar şiş hüceyrələrinin daxilində çoxalaraq onları daxildən məhv edir və eyni zamanda orqanizmin immun reaksiyasını stimullaşdırır.

Agentliyin məlumatına görə, "Oncolys" şirkəti preparatı bazara çıxarmaq üçün Yaponiyada "mürəkkəb tənzimləyici maneəni" aşmalı olub. Virusların kommersiya miqyasında istehsalı ciddi keyfiyyət nəzarəti tələb edir. Bundan əlavə, onkolitik preparatların klinik sınaqları da fərqli protokolla aparılır. Çünki virus şiş boyunca yayıldıqca müalicəvi təsir yalnız bir neçə həftədən sonra özünü göstərə bilər.