İran ABŞ və İsrailin həyata keçirdiyi hücumlar nəticəsində ölkəyə dəymiş ziyanın ilkin olaraq təxminən 270 milyard dollar olduğunu açıqlayıb.

Liderxeber.az xəbər verir ki, bunu “RİA Novosti”yə müsahibəsində İran hökumətinin sözçüsü Fatma Mühacerani deyib.

Onun sözlərinə görə, müharibə dövründə müxtəlif bölgələrdə baş verən hücumlar nəticəsində infrastruktur, sənaye obyektləri və mülki yaşayış sahələrinə ciddi ziyan dəyib. Hazırda müvafiq qurumlar ziyanın dəqiq hesablanması üçün araşdırmaları davam etdirir.

Qeyd edilib ki, ilkin qiymətləndirmələrə əsasən, ümumi təzminat məbləği 270 milyard dollar civarındadır və yekun rəqəm daha sonra dəqiqləşdiriləcək.

O, məsələ ilə bağlı İran rəsmilərinin, o cümlədən, Prezident Məsud Pezeşkianın müxtəlif vaxtlıarda zərərin kompensasiyası məsələsini əsas tələb kimi gündəmə gətirdiklərini bildirib.

Mühacerani təzminat hesablamalarına mülki infrastrukturla yanaşı, hücumlar nəticəsində həlak olan şəxslərin, o cümlədən, Minab bölgəsində məktəbə edilən hücumda həyatını itirənlərin də daxil edildiyini qeyd edib.

Bildirilib ki, 8 aprel tarixində atəşkəs elan edildikdən sonra Tehran tərəfi danışıqlarda əsas şərtlərdən biri kimi “İrana dəyən ziyanın tam hesablanması və ödənilməsi” məsələsini irəli sürüb.