ABŞ ordusu yaxın iki ay ərzində Suriyada qalan təxminən 1000 hərbçisini tamamilə ölkədən çıxarmağa hazırlaşır.

Liderxeber.az xəbər verir ki, bu barədə “The Wall Street Journal” (WSJ) nəşri üç ABŞ rəsmisinə istinadən məlumat yayıb.

Bildirilir ki, Pentaqon Suriyada mövcud olan bütün hərbi kontingentin mərhələli şəkildə geri çəkilməsini planlaşdırır və prosesin iki ay ərzində başa çatdırılması nəzərdə tutulur.

Məlumata görə, çıxarılma tamamlandıqdan sonra ABŞ-nin Suriyadakı təxminən 10 illik hərbi mövcudluğu sona çatmış olacaq.

Rəsmilərdən ikisi qeyd edib ki, ABŞ ordusu bu ayın əvvəlində Suriya-İordaniya-İraq sərhədində yerləşən strateji Ət-Tənf qarnizonu və Suriyanın şimal-şərqindəki Şəddadi Hava Bazasından çıxarılmanı başa çatdırıb.

Hesabatda qeyd edilir ki, Donald Trump administrasiyası YPG-nin “demək olar ki, tamamilə parçalanması” səbəbindən ABŞ-nin Suriyadakı hərbi mövcudluğunu artıq zəruri hesab etmir.

Digər bir ABŞ rəsmisi isə Vaşinqtonun yeni mərhələdə Suriya Prezidenti Əhməd əl-Şaraanın administrasiyası ilə daha yaxın diplomatik münasibətlər qurmağı və ölkə daxilində mümkün təhdidlərə qarşı prosesi diplomatik kanallar vasitəsilə idarə etməyi planlaşdırdığını bildirib.