“Vaşinqton sanksiyaların ləğvini müzakirə etməyə razılaşarsa, İran ABŞ ilə nüvə sazişi üzrə kompromisə gedə bilər”.

Liderxeber.az BBC-yə istinadən xəbər verir ki, bu bəyanatla İranın xarici işlər nazirinin müavini Məcid Taxt-Rəvançi çıxış edib.

“Əgər onlar sanksiyalar barədə danışmağa hazırdırlarsa, biz də proqramımızla bağlı bu və digər məsələləri müzakirə etməyə hazırıq”, - diplomat deyib.

Taxt-Rəvançi qeyd edib ki, indi top Amerika tərəfindədir və onlar həqiqətən saziş bağlamaq istəklərini sübut etməlidirlər.

İsrailin Baş naziri Binyamin Netanyahu isə İranla istənilən potensial sazişin təkcə İsrail və ABŞ-nin deyil, eləcə də bütün dünyanın təhlükəsizliyini təmin edən sərt tələblərə cavab verməli olduğunu deyib. 

“Əgər biz razılığa nail olmaq istəyiriksə, o, bir sıra əsas elementləri əhatə etməlidir. Fikrimizcə, bu elementlər təkcə İsrailin deyil, həm də ABŞ-nin, regionun və bütün dünyanın təhlükəsizliyi üçün həyati əhəmiyyət kəsb edir”, - İsrailin Baş naziri bildirib.

Netanyahunun irəli sürdüyü şərtlərə görə, İran bütün uranı ölkədən çıxarmalı, uranın zənginləşdirilməsi üzrə bütün avadanlıq və infrastrukturu ləğv etməli, Raket Texnologiyalarına Nəzarət Rejiminin 300 km-lə məhdudlaşdırılmasına razılıq verməli və “terror oxu”nu aradan qaldırmalıdır.