Koreya Xalq Demokratik Respublikasının (KXDR) lideri Kim Çen In Vladimir Putinlə telefon danışığı zamanı Şimali Koreyanın Rusiya rəhbərliyinin qəbul etdiyi qərarları hər zaman tam dəstəkləyəcəyini bəyan edib.

Liderxeber.az-ın xəbərinə görə, bu barədə Koreya Mərkəzi Xəbər Agentliyindən məlumat verilib.

"Kim Çen In əmin edib ki, Şimali Koreya həmişə KXDR və Rusiya Federasiyası (RF) arasında bağlanmış müqavilənin ruhuna sadiq qalacaq, həmçinin RF rəhbərliyi tərəfindən görülən bütün tədbirləri tam dəstəkləməyə davam edəcək", - deyə məlumatda bildirilib.

KXDR-in qeyd etdiyi kimi, Putin və Kim Çen In, eyni zamanda, Şimali Koreya və Rusiya arasında Strateji Tərəfdaşlıq haqqında Müqavilə çərçivəsində əməkdaşlığın dərinləşməsini də yüksək qiymətləndirib və onu daha da inkişaf etdirmək niyyətlərini təsdiqləyiblər.

Daha əvvəl isə Kremlin Mətbuat Xidməti Putinin Kim Çen In ilə telefon danışığı barədə məlumat yayıb. Onlar bildiriblər ki, Rusiya prezidenti Şimali Koreya lideri ilə avqustun 15-də Alyaskada baş tutacaq ABŞ Prezidenti Donald Trampla gözlənilən danışıqlar kontekstində məlumat bölüşüb.