Şəkərsiz diabet - böyrəklərdə suyun sorulması və sidik konsentrasiyasının pozulması ilə özünü göstərən xəstəliklər qrupudur. Bu xəstəlik güclü susuzluqla müşayiət olunur və bu zaman insan gündə 3-20 litr su içə bilər.

Liderxeber.az-ın gazeta.ru-ya istinadla verdiyi məlumata görə, bu barədə Avropa Tibb Mərkəzinin (EMC) endokrinoloqu, preventiv və anti-age təbabət mütəxəssisi Kamilə Tabeyeva danışıb.

O, gündüz və gecə vaxtı bol və tez-tez sidik ifrazı, dəri quruluğu və kifayət qədər maye çatışmazlığı fonunda zəifliyin də şəkərsiz diabetin əlamətləri arasında olduğunu vurğulayıb.

"Xəstəlik tez-tez qəbizliklə müşayiət olunur. Şəkərsiz diabet, əsasən, artmış iş yükü səbəbindən böyrək funksiyasının azalması riski ilə təhlükəlidir. Susuzlaşma və qanın qatılaşması səbəbindən tromb əmələ gəlmə təhlükəsi də yaranır. Digər fəsadlara mədə-bağırsaq sisteminin işinin pozulması, zəiflik, əsəbilik və sinir sisteminin zədələnməsi də daxildir", - deyə həkim bildirib.

Şəkərsiz diabet irsiyyət problemləri fonunda gen mutasiyaları, hipofiz və hipotalamus sahəsində beyin törəmələri, kəllə-beyin travması, müxtəlif infeksion xəstəliklər və vazopressin hormonunun qəbul edilməməsi ilə əlaqəli böyrək xəstəlikləri səbəbindən inkişaf edə bilər.

"Bununla belə, şəkərsiz diabet nadir xəstəlikdir. Beyində, xüsusilə hipofiz və hipotalamusda vazopressin (antidiuretik hormon) ifraz olunur. Bu hormon orqanizmdə nə qədər suyun qalmalı və nə qədərinin orqanizmdən çıxmalı olduğunu tənzimləyir. Hormonun ifrazının və ya təsirinin pozulması nəticəsində şəkərsiz diabet inkişaf edir. Xəstəliyin pik dövrü 20-30 yaş arasına düşür", - deyə həkim əlavə edib.