“18 yaşınadək analar tərəfindən doğulan uşaqların sayında azalma müşahidə olunur. 2023-cü ildə 1742 belə uşaq doğulmuşdusa, 2024-cü ildə bu rəqəm 463 nəfər azalaraq 1279 olub”.

Liderxeber.az xəbər verir ki, bunu Ailə, Qadın və Uşaq Problemləri üzrə Dövlət Komitəsinin sədri Bahar Muradova Milli Məclisin bu gün keçirilən plenar iclasında “Gender bərabərliyinin təmin edilməsinə nəzarəti həyata keçirən icra hakimiyyəti orqanının 2024-cü ildə fəaliyyəti haqqında məlumatı”n təqdimatı zamanı bildirib.

O qeyd edib ki, 14 iqtisadi rayon üzrə nikah yaşının 1 il azaldılması ilə bağlı verilən icazələrin sayında (64 hal) azalma müşahidə olunub. Bu hal 2024 cü ildə 185, 2023 cü ildə 249 olub.

“2023-cü illə müqayisədə nikahların sayı azalıb, boşanmaların sayı isə dəyişməyərək eyni səviyyədə qalıb. Nikaha daxilolma 49 508, boşanmaların sayı isə 21 384 olub. Bundan başqa, 2024-cü ildə doğulan qız uşaqları ilə oğlan uşaqları arasındakı fərq azalıb. Say 7008-dən 6132-ə düşüb. Cins nisbəti hər 100 qıza 113 oğlan təşkil edir. 2020-ci ildə isə cins nisbəti hər 100 qıza 114 oğlan təşkil edib”, - deyə, Bahar Muradova bildirib.