Əvvəldən qeyd edim ki, başlıqda verilən sualın cavabı yoxdur. Amma bu yazı sərnişinləri aldatmaq üçün yazılmayıb.

Keçək mətləbə.Mayın 7-də "Bakı Metropoliteni" QSC-yə "köhnə qatarlar nə vaxt sıradan çıxarılacaq?" sorğusunu ünvanladıq. "İnformasiya əldə etmək haqqında" Qanunun 24.2-ci maddəsində qeyd olunur: "İnformasiya öz operativliyini itirərsə, sorğuya dərhal, bu mümkün olmadıqda isə 24 saatdan gec olmayaraq cavab verilməlidir". Bu gün 14 maydır, sorğunun üzərindən bir həftə keçib. Metro rəsmiləri isə qış yuxusundan hələ də ayılmayıblar. Yaxud da jurnalistin sorğusunu cavablamağı özlərinə əziyyətli və lüzumsuz bir iş hesab edirlər.

Yay fəsli qapıdadır, ancaq Bakı metrosunda hələ də köhnə qatarlar fəaliyyətdədir, özü də say üstünlüyü ilə. Metropoliten sözçüsünün son açıqlamalarına istinad etsək, hər gün xəttə 40-46 qatar buraxılır, onlardan yeni qatarların sayı cəmi 23-dür. Yəni yarısı köhnə qatarlardır.

Köhnə qatarların dili olsa, bəlkə də, "bizdən əl çəkin" deyərlər. Çünki sözün əsl mənasında can verirlər. Bu yaxınlarda hərəkətdə olarkən qatardan tüstü iyinin gəldiyini müşahidə etdim. Nə yalan deyim, bir anlıq yanğın çıxacağını, ikinci metro faciəsinin olacağını düşündüm.

Metro rəsmilərinin açıqlamalarının aşağı-yuxarı mahiyyəti həmişə eynidir: "Yaxşı olacaq".

Bəs yaxşı olurmu?

Təəssüf, cənablar, yaxşı deyil, bu gedişlə də olmayacaq. Hörmətli rəsmilər, özünüzə verdiyiniz "niyə?" sualını da eşidirəm.

Cavabını deyim. Metroda sıxlıq yenə də pik həddədir, interval böyükdür, havasızlıqdan ürəyi gedənlərin sayı az deyil. Bu məqamda ortaya sual çıxır: sərnişinlər sıxlığa və havasızlığa indi dözə bilmirlərsə, yayda necə olacaq? Köhnə qatarlara kondisioner quraşdırmağın mümkün olmadığını nəzərə alsaq, bu yay da Bakı metrosunun "sauna"dan fərqlənməyəcəyini deyə bilərik.

Səbəblər isə həmişə eynidir: "Xərci çoxdur, quraşdırılması mümkün deyil, istismar müddəti bitməyib" və sair.

Son illər "Bakı Metropoliteni"ndə gediş haqqı artırıldı. Müvafiq şəxslər bu addımı xərclər və keyfiyyət dəyişikliyi ilə əlaqələndirdilər. Çox keçmədən sözügedən qurumda rəhbərlik dəyişdirildi, yeni gözləntilər formalaşdı. Lakin görünən odur ki, yeni rəhbərliyin də köhnədən fərqi olmadı. Keyfiyyət isə sözdə dəyişib, əməldə bir Allahın qulu görməyib.

İşlərdə müsbətə doğru hansısa dəyişiklik görməyəndə çoxları əlini yelləyib, "toplananların yerini dəyişəndə cəm dəyişmir" deyirlər. Amma dəyişiklik zərurətinin məntiqini də gərək o dəyişilənlər düşünsünlər axı - komponentlərin yerini və özünü niyə dəyişdilər ki? Biz niyə buradayıq? Köhnə qatarlar niyə hələ də hərəkətdədir?