ABŞ-nin Massaçusets Amherst Universiteti və Amerika Universitetinin alimləri müəyyən ediblər ki, çöldə havanın temperaturu 20°C-dən aşağı düşəndə ​​arıqlamaq motivasiyası zəifləyir.

Liderxeber.az xəbər verir ki, tədqiqatın nəticələri "Journal of Environmental Economics and Management" jurnalında dərc olunub.

ABŞ-də 1991-ci ildən 2010-cu ilədək davam edən sorğulara əsaslanan tədqiqat zamanı məlum olub ki, 20°C-dən aşağı temperaturda insanlar pəhriz saxlamaq və fiziki aktivliyi artırmaq da daxil olmaqla, arıqlamağa çalışdıqlarını daha az bildirirlər. Ancaq isti havalarda, xüsusən də temperatur 25°C-dən yuxarı qalxdıqda, respondentlər daha çox sağlam həyat tərzi sürməyə çalışırlar: daha çox idman edir və qida rasionlarında meyvə və tərəvəzlərin nisbətini artırırlar.

"Havanın davranışa bu dərəcədə təsir etdiyi bizi təəccübləndirib. Ən soyuq gündən ən isti günə keçid davranışın təxminən 7% dəyişməsi ilə nəticələnir", - deyə araşdırmanın həmmüəllifi Brendon F.Çerçil bildirib.

Tədqiqatçıların sözlərinə görə, bu, xüsusilə artıq çəki və piylənmədən əziyyət çəkən insanlar arasında özünü göstərib. Onlar soyuq günlərdə arıqlamağa daha az meyilli olublar və isti havada daha yüksək aktivlik nümayiş etdiriblər.