Müəyyən qida əlavələrinin müntəzəm istehlakı 2-ci tip şəkərli diabet riskinin artmasına səbəb ola bilər.

Liderxeber.az-ın Lenta.ru-ya istinadən verdiyi xəbərə görə, bu qənaətə Parisin Sorbonna Universitetinin tədqiqatçıları gəliblər. Onlar 108 643 nəfərin məlumatlarını təhlil ediblər.

Tədqiqatın nəticələri nüfuzlu "PLOS Medicine" elmi jurnalında dərc olunub.

Səkkiz il ərzində iştirakçılar öz qidalanma vərdişləri, o cümlədən diyetik içkilər, desertlər, qəlyanaltılar və hazır yeməklər kimi ultra emal olunmuş qidalarda tez-tez rast gəlinən qida əlavələrindən istifadə barədə məlumat veriblər.

Aparılan təhlillər göstərib ki, müəyyən qida əlavələrindən tez-tez istifadə edən şəxslərdə şəkərli diabetin inkişaf riski 8-13% daha yüksək olub. Bu əlavələrə əsasən süni dadlandırıcılar (aspartam, sukraloza, asesulfam-K), eləcə də məhsulun dadını, görünüşünü və saxlanma müddətini yaxşılaşdırmaq üçün istifadə olunan konservantlar, rəngləndiricilər və emulqatorlar daxildir.

Məsələn, "Coca-Cola Zero" kimi şəkərsiz içkilər zərərsiz alternativ kimi təqdim edilsə də, onların tərkibində süni dadlandırıcılar olur. Tədqiqat bu maddələrin müntəzəm istifadəsi ilə maddələr mübadiləsinin pozulması arasında mümkün əlaqəni göstərir.

Alimlər vurğulayıblar ki, burada əsas məsələ ultra emal olunmuş qidaların tez-tez və uzun müddət ərzində qəbul edilməsinin kumulyativ təsiridir. Əldə edilən məlumatlar hələ birbaşa səbəb-nəticə əlaqəsini sübut etməsə də, qida əlavələrinin daimi istehlakı ilə bağlı narahatlıqları artırır.