Nəyə görə şəkərdən imtina etmək olmaz? - Ekspertdən xəbərdarlıq
Şəkərdən söhbət gedəndə, bir çoxları hesab edir ki, bu, mütləq zərərli məhsuldur və orqanizmə heç bir faydası yoxdur. Bəs həqiqətdə də belədirmi?
Liderxeber.az-ın gazeta.ru-ya istinadla məlumatına görə, rusiyalı endokrinoloq Olqa Karişeva bu fikri təkzib edib.
Onun sözlərinə görə, şəkər əslində bədənimiz üçün vacibdir, çünki o karbohidratlarla eyniləşdirilə bilər. Karbohidratlar isə bizim əsas enerji mənbəyimizdir.
"Hansı karbohidrat (qrup və növlər kifayət qədərdir) orqanizmimizə daxil olursa olsun, o qaçılmaz olaraq qlükozaya çevrilir. Məhz qlükoza əsas enerji mənbəyidir. Beyin qlükoza ilə qidalanır və digər orqanlarla müqayisədə onu daha çox miqdarda istehlak edir. Sonra isə, necə deyərlər, ehtiyaca görə, orqanların, əzələlərin və orqanizmin digər strukturlarına lazımi diqqət yetirilir", - deyə mütəxəssis əlavə edib.
Eyni zamanda, o vurğulayıb ki, məhz həyati zərurət səbəbindən, çatışmazlıq yarandığı təqdirdə beynimiz "panikaya düşməsin" deyə orqanizmimizdə qanda qlükozanı artıran bir neçə hormon var.
Karbohidratlar hormonların və müxtəlif bədən proseslərinin tərkib hissəsidir. Məsələn, onlar qalxanabənzər vəzinin, reproduktiv sistemin və dəmir daşınmasının işini dəstəkləyir.
Risklər və düzgün balans
Həkim bildirib ki, əsas problem şəkərin özündə yox, onun həddindən artıq istehlakındadır.
"Hər bir "artıq" karbohidrat yağ toxumasına çevrilir, bu da öz növbəsində ateroskleroz, hipertoniya xəstəliyi, infarkt, insult, şəkərli diabet, obstruktiv yuxu apnoesi, oynaq problemləri, erektil disfunksiya və bəzi onkoloji xəstəliklərin yaranma riskini dəfələrlə artırır", - deyə endokrinoloq əlavə edib.
Nə etməliyik?
Mütəxəssis bildirib ki, bunun qaydası sadədir - rasional qidalanma və aktiv həyat tərzi.
"Karbohidratlardan qorxmaq lazım deyil - sadəcə balansı qorumaq vacibdir. Optimal qidalanma nisbəti 1:1:4 olmalıdır: bir hissə zülal, bir hissə yağ və dörd hissə karbohidrat. Fərdi gündəlik kalori normanızı hesablayın, həyatınıza müntəzəm fiziki aktivlik əlavə edin və karbohidratlardan qorxmayın", - deyə Karişeva yekunlaşdırıb.
