Gecə yuxudan qəfil oyanıb yenidən yuxuya getməkdə çətinlik çəkirsinizsə, bunun narahatlıq doğuran hal olmadığını bilməlisiniz.

Axşam.az xəbər verir ki, yuxu üzrə mütəxəssislər gecə ərzində bir neçə dəfə oyanmağın tamamilə normal olduğunu bildirirlər. Yuxu fizioloqu Stefani Romişevski deyib ki, insanların fasiləsiz və birnəfəsə yatmalı olduğu fikri geniş yayılsa da, əslində gecə oyanmaları sağlam yuxunun təbii hissəsidir.

Mütəxəssislərin sözlərinə görə, yuxu təxminən 90 dəqiqə davam edən dövrlərdən ibarətdir. Sağlam yetkin insanlar gecə ərzində bu dövrlər zamanı iki-dörd dəfə oyanırlar. Lakin bu oyanmalar əksər hallarda cəmi bir neçə saniyə çəkdiyi üçün insanlar onları xatırlamırlar.

Qeyd olunub ki, gecənin ilk yarısında dərin yuxu üstünlük təşkil edir. Səhərə yaxın isə yuxu yüngülləşdiyi üçün kiçik səs, işıq və ya digər narahatlıqlar belə insanın oyanmasına səbəb ola bilər.

Mütəxəssislər bildirirlər ki, əsas problem oyanmaq deyil, insanın həmin an narahat olmağa başlamasıdır. Beyin "artıq yata bilməyəcəyəm" düşüncəsini qəbul etdikdə, ayıqlığı artıran kortizol hormonunun səviyyəsi yüksəlir və yenidən yuxuya getmək çətinləşir.

Yuxu mütəxəssisləri belə hallarda saata baxmamağı, təşvişə qapılmamağı və bədənin yenidən yuxuya keçməsi üçün sakit qalmağın daha faydalı olduğunu vurğulayırlar.