Kənd Təsərrüfatı Nazirliyinin Əkinçilik Elmi-Tədqiqat İnstitutunda xalqın qan yaddaşına əbədi həkk olmuş 20 Yanvar faciəsinə həsr olunmuş anım tədbiri keçirilib. 

Liderxeber.az xəbər verir ki, şəhidlərin əziz xatirəsi bir dəqiqəlik sükutla yad edilib. İnstitutun direktoru Faiq Xudayev Qanlı Yanvar həqiqətlərindən bəhs edərək diqqətə çatdırıb ki, 1990-cı ilin Yanvar ayında sovet kommunist rejiminin öz varlığını saxlamaq, xalqların və insanların azadlıq səsini susdurmaq planı baş tutmadı. Təcavüz öz məqsədinə nail ola bilmədi. 20 Yanvar Azərbaycan xalqının öz torpaqlarını qorumaq və azad etmək uğrunda hər cür fədakarlıqlara qadir olmaq, güclü və qüdrətli dövlət qura bilmək və yaşatmaq potensialını və haqqını ortaya qoydu. 

F.Xudayev vurğulayıb ki, şəhidlərimizin əziz xatirəsi qəlbimizdə əbədi yaşayacaq, ölkəmiz daim inkişaf edəcək.

Tədbirdə 20 Yanvar faciəsini əks etdirən videoçarx nümayiş olunub. Daha sonra institutun əməkdaşları Qanlı 20 Yanvar faciəsi ilə bağlı fikirlərini bildiriblər.