Almaniya Federativ Respublikasının (AFR) Pakistandakı səfirliyinin müşaviri İslamabaddakı mənzilində ölü tapılıb.

Liderxeber.az-ın xəbərinə görə, bu barədə "Bild" nəşri məlumat verib.

Məlumata görə, Tomas B. adlı şəxs əslində Almaniya Federal Kəşfiyyat Xidmətinə çalışsa da, diplomat sayılıb.

O, iki gün ərzində səfirliyə gəlməyib və zənglərə cavab verməyib, daha sonra missiyanın iki əməkdaşı onun yaşadığı ünvana göndərilib. Onlar mənzildə həmkarlarının cəsədini aşkar ediblər.

"Bild"in qeyd etdiyi kimi, Tomas ürək xəstəliyindən əziyyət çəkib və istisna deyil ki, ölümə gətirib çıxaran da bu olub. O, 3.5 il ərzində İslamabadda missiya müşaviri vəzifəsində çalışıb.

"Təəssüf ki, biz həmkarımızın ölümünü təsdiqləməyə məcburuq", - deyə Almaniya Xarici İşlər Nazirliyindən bildirilib.

Almaniya Federal Kəşfiyyat Xidməti yalnız onu qeyd edib ki, prinsip etibarilə, agentliyin ayrı-ayrı əməkdaşları ilə bağlı insidentləri şərh etmir.

"Bild"in xəbərinə görə, Tomas uzun müddət Almaniya kəşfiyyat xidmətinə çalışıb və çox təcrübəli əməkdaş hesab edilib.