"2026-cı il Qurban Bayramı ərəfəsində aparılan araşdırmalar göstərir ki, hər 3 nəfərdən 1-i bayram günlərində şəhərdən kənara çıxmağı planlaşdırır. Bu isə daxili turizm bazarı üçün ciddi iqtisadi imkan hesab olunur. Lakin müşahidələr göstərir ki, Azərbaycanda turizm sektorunun bir hissəsi artan tələbi uzunmüddətli inkişaf fürsəti kimi deyil, qısamüddətli qazanc imkanı kimi qiymətləndirir".

Bunu Liderxeber.az-a açıqlamasında satış və marketinq mütəxəssisi Abbasəli Hüseynov bildirib.

Onun sözlərinə görə, bağlı sərhədlər yerli turizmin inkişafı üçün nadir imkan yaratsa da, bazar bu fürsətdən strateji şəkildə yararlana bilmir.

Müsahibimiz hesab edir ki, hazırda əsas problem tələbin olmaması deyil:

"Problem ondan ibarətdir ki, bir çox sahibkar bazarda yaranmış məcburi tələbi yanlış idarə edir. Qiymətlərin kəskin artırılması, xidmət keyfiyyətinin isə eyni qalması istehlakçıda narazılıq və etimadsızlıq yaradır. Bu isə uzunmüddətli perspektivdə daxili turizmə zərbə vurur. Daha pisi isə insanları influser və bloqerlərin vasitəsilə aldadıb şəhərdən  yüz kilometirlərlə yolu istirahət mərkəzlərinə ucuz qiymətə gətizdirirlər, sonradan bu kampaniyanın bitdiyini deyirlər…”

Onun fikrincə, turizm sektorunda ilk növbədə qiymət intizamı və gəlir idarəetməsi (Revenue Management) yanaşması tətbiq edilməlidir.

“Qiymət artımı bazar reaksiyasına əsaslana bilər, amma bu, nəzarətsiz olmamalıdır. Demand-based pricing modeli, fərqli müştəri seqmentləri üçün ayrıca paketlər, erkən rezervasiya üstünlükləri və ailə paketləri artıq standart yanaşmaya çevrilməlidir. Məqsəd yalnız bir bayramda maksimum qazanmaq deyil, müştərinin növbəti dəfə də Azərbaycanda istirahəti seçməsini təmin etməkdir.”

Hüseynov Abbasəli bildirir ki, Azərbaycanda turizmin əsas problemlərindən biri də vahid və şəffaf satış platformasının olmamasıdır.

“Bu gün müştəri fərqli hotellər arasında şəffaf müqayisə aparmaqda çətinlik çəkir. Yerli turizm üçün vahid marketplace modelinə ehtiyac var. Qiymətlərin, xidmətlərin, real istifadəçi rəylərinin bir platformada toplanması bazarda həm sağlam rəqabət yaradacaq, həm də süni qiymət artımının qarşısını alacaq.”

Ekspertə görə, bazarda yalnız satış deyil, xidmət standartlarının idarə olunması da zəifdir.

“Turizmdə marketinq yalnız reklam deyil. Müştərinin ilk zəngdən check-out anına qədər yaşadığı bütün təcrübə marketinqin bir hissəsidir. Cavab sürəti, otaq təmizliyi, personal davranışı və şikayətlərin həlli üzrə minimum xidmət standartları müəyyən edilməlidir. Əks halda, ən yaxşı reklam belə reputasiya itkisini kompensasiya edə bilməz.”

Satış və marketinq mütəxəssisi hesab edir ki, Azərbaycanda hotellər və istirahət mərkəzləri CRM və loyallıq proqramlarından da kifayət qədər istifadə etmir.

“Mövcud müştərini geri qaytarmaq yeni müştəri cəlb etməkdən daha ucuzdur. Təkrar rezervasiya endirimləri, fərdiləşdirilmiş təkliflər, referral bonuslar və loyal müştəri proqramları daxili turizmdə standart satış alətinə çevrilməlidir.”