Kənd Təsərrüfatı Nazirliyi (KTN) Əkinçilik Elmi-Tədqiqat İnstitutunda (ƏETİ) dünya aqrar elminin xəzinəsini zənginləşdirən görkəmli seleksiyaçı alim, məhsuldar və keyfiyyətli taxıl sortlarının yaradılmasında əzmlə çalışmış ictimai xadim, “Şərəf nişanı” ordenli, əməkdar kənd təsərrüfatı işçisi, prezident təqaüdçüsü Əsəd Cənət oğlu Musayevin anadan olmasının 88-ci ildönümünə həsr olunmuş tədbir keçirilib.

Liderxeber.az xəbər verir ki, tədbiri ƏETİ-nin direktoru Faiq Xudayev giriş nitqi ilə açıb. Ə.C.Musayevin xatirəsi bir dəqiqəlik sükutla yad edilib.

Tədbirdə çıxış edən iştirakçılar görkəmli seleksiyaçı alim Ə.C.Musayev haqqında geniş məlumat verərək, respublikada taxılçılığın inkişafında olan xidmətlərindən bəhs ediblər. Sonra alimin elmi fəaliyyətinə həsr olunmuş video material nümayiş edilib.

Qeyd edək ki, Ə.C.Musayev 1938-ci il yanvarın 8-də tarixən əzəli Türk torpağı olan Ermənistan adlandırılan respublikanın Amasiya rayonunun Oxçuoğlu kəndində, kəndli ailəsində anadan olub. 1957-ci ildə İrəvan Kənd Təsərrüfatı Texnikumunu fərqlənmə diplomu ilə bitirib, həmin ildə Azərbaycan Kənd Təsərrüfatı İnstitutunun aqronomluq fakültəsinə daxil olub və 1962-ci ildə alim aqronom ixtisası üzrə bitirib. 1962-1964-cü illərdə Kənd Təsərrüfatı Nazirliyinin Bakı Torpaq Ekspedisiyasında əvvəlcə mühəndis-torpaqşünas, sonra isə dəstə rəisi kimi Kür-Araz ovalığının, xüsusilə Sabirabad, Salyan, Neftçala, habelə Siyəzən, Dəvəçi rayonlarının torpaq örtüyünün öyrənilməsində fəal iştirak edib. 1964-cü ildən etibarən respublikada taxılçılığın inkişafı problemlərinin həlli ilə məşğul olmağa başlayan Ə.C.Musayev daha məhsuldar, yüksək dən keyfiyyətinə malik, yerə yatmayan, xəstəliklərə davamlı taxıl sortlarının yaradılması və toxumçuluğu istiqamətində Azərbaycan Elmi-Tədqiqat Əkinçilik İnstitutunda (ETƏİ) geniş tədqiqat işləri aparıb və 1969-cu ildə “Toxumluq əkinlərdə sort qarışıqlarının əmələ gəlməsi və onun qarşısını almaq yolları” mövzusunda dissertasiya işini müdafiə edərək kənd təsərrüfatı elmləri namizədi elmi dərəcəsi adına layiq görülüb. Ə.C.Musayev 1967-ci ildə ETƏİ-nin Abşeron Dayaq Məntəqəsinin müdiri, 1970-1972-ci illərdə Tərtər Bölgə Təcrübə Stansiyasının direktoru vəzifələrində işləyib. 1973-cü ildən ETƏİ-də böyük elmi işçi, 1976-cı ildən “Seleksiya və Toxumçuluq” şöbəsinin müdiri vəzifəsində çalışıb. O, institutda rəhbərlik etdiyi “Seleksiya və toxumçuluq” şöbəsində qırx ildən artıq bir müddətdə bir sıra buğda, arpa, qarğıdalı, soya, lobya, noxud, tritikale bitkilərinin 20 mindən çox genofondunu toplamağa nail olmuş, onun rəhbərliyi və bilavasitə iştirakı ilə dənli, dənli-paxlalı bitkilərin 90-dan çox sortu yaradılıb, Seleksiya Nailiyyətlərinin Sınağı və Mühafizəsi üzrə Dövlət Komissiyasına (hazırkı Aqrar Xidmətlər Agentliyi) təqdim edilib ki, indiyədək onlardan 47-si rayonlaşıb, seleksiya nailiyyətlərinin Dövlət Reyestrinə daxil edilib və patentləşdirilib. Bu sortlar hal-hazırda respublikada geniş əkin sahələrinə malikdir. Ə.C.Musayev ölkənin ərzaq təhlükəsizliyinin təmin edilməsi baxımından əsas strateji bitki hesab olunan rayonlaşdırılmış 32 bərk və yumşaq buğda sortlarının müəllifidir.

Mərhum alim “Şərəf nişanı” ordeni ilə təltif edilib, "Əməkdar kənd təsərrüfatı işçisi" fəxri adına və Azərbaycan Respublikası Prezidentinin fərdi təqaüdünə layiq görülüb.

Ə.C.Musayev 21 yanvar 2018-ci ildə 80 yaşında dünyasını dəyişib.

Allah rəhmət eləsin!