"AZCON Holding" şirkətlərindən olan “Azərbaycan Dəmir Yolları” QSC-nin “Bakı Beynəlxalq Dəniz Limanı” MMC-nin təşkil etdiyi “ROBOPORT” adlı robototexnika, kodlama və STEAM kursunun ikinci qrup məzunları proqramı uğurla başa vurublar.

Liderxeber.az xəbər verir ki, Ələt qəsəbəsinin məktəbliləri üçün keçirilən bu kursda ümumilikdə 22 nəfərdən ibarət iki qrup iştirak edib və təlimi uğurla tamamlayıb.

“Gələcəyin mühəndisləri burada yetişir” şüarı ilə keçirilən “ROBOPORT” proqramında məqsəd uşaqlara erkən yaşlardan texnologiya və kodlaşdırma sahəsində əsas bilikləri öyrətməkdir. 

Tədbirdə texnologiyanın bugünkü dövrdə mühüm rol oynadığı, kursda qazanılan biliklərin real həyatda tətbiqinin vacibliyi bildirilib.

Sonda “ROBOPORT” proqramını uğurla tamamlayan şagirdlərə sertifikat və hədiyyələr təqdim olunub.

Qeyd edək ki, STEAM kursları müxtəlif fənləri inteqrasiya edərək, nəzəriyyə ilə praktikanı birləşdirərək şagirdlərə real həyat problemlərini həll etmə bacarığı qazandırır. Bu kurslarda uşaqlar yalnız faktları öyrənmir, həm də analiz edir, suallar verir və fərqli yollarla düşünməyi öyrənirlər. Bu onların innovativ və yaradıcı fərdlər kimi yetişməsinə kömək edir. STEAM kursları qrup şəklində təşkil edilərək şagirdlərə əməkdaşlıq etməyi, fikirlərini düzgün ifadə etməyi və liderlik bacarıqlarını inkişaf etdirməyi öyrədir, şagirdlər öz layihələrini qurur, təqdim edir və uğur qazandıqca özünə inamları artır.