ABŞ və Çin arasında ticarət danışıqları nəticəsində bəzi məhdudiyyətlərin ləğvi gözlənilir.

Liderxeber.az-ın "Planet Today"ə istinadla verdiyi məlumata görə, bu barədə Çin Ticarət Nazirliyi bəyan edib.

Bildirilib ki, Çin nəzarət altında olan məhsulların ixracına dair müraciətləri qanuni əsaslarla təsdiqləyəcək, ABŞ isə Çinlə bağlı bir sıra məhdudiyyətləri aradan qaldıracaq.

"Londondakı görüşdən sonra tərəflər detalları razılaşdırıblar və qarşılıqlı anlaşma əsasında ticarət əlaqələrinin sabit və davamlı inkişafı üçün əməkdaşlıq edəcəklər", - deyə məlumatda vurğulanır.

Bundan əvvəl ABŞ Prezidenti Donald Tramp iyunun 25-də Çinlə yeni ticarət sazişi imzalandığını açıqlamışdı.

Qeyd edək ki, iyunun 9-10-da Londonda keçirilən iqtisadi məsləhətləşmələr mayın 10-11-də Cenevrədə baş tutan görüşlərin nəticəsi olaraq yaradılmış mexanizmin tərkib hissəsidir və həmin görüşdə tərəflər qarşılıqlı rüsumların bir hissəsini azaltmaq barədə razılığa gəlmişdilər.