Neftçala Rayon İcra Hakimiyyətinin başçısı Beştalı kənd sakinləri ilə səyyar görüş keçirib. Vətəndaş qəbulunda Neftçala Rayon İcra Hakimiyyətinin başçısı Mirhəsən Seyidov, RİH-in məsul şəxsləri, hüquq- mühafizə orqanlarının, idarə, müəssisə və təşkilatların rəhbərləri, şəhid ailələri, qazilər və kənd sakinləri iştirak ediblər.

İlk öncə, Ulu Öndər Heydər Əliyevin və Azərbaycan Respublikasının ərazi bütövlüyünün, müstəqilliyinin, konstitusiya quruluşunun müdafiəsi zamanı şəhid olan hərbi qulluqçuların ruhu bir dəqiqəlik sükutla yad edilib.
 
Cəngan kənd ərazi dairəsi üzrə nümayəndə çıxış edərək, Beştalı kəndi haqqında görüş iştirakçılarına geniş məlumat verib.
 
Çıxışçılar “Rəşadətli Azərbaycan Ordusu xalqımızın güvənc və qürur mənbəyidir” mövzusunda iştirakçılara ətraflı məlumat veriblər. Bildirilib ki, ordumuzun maddi-texniki bazasının hər ötən gün artması, Silahlı Qüvvələrimizin silah arsenalına yeni silahların cəlb edilməsi bu gün Azərbaycan Ordusunu dünyanın ən güclü orduları sırasında qərarlaşdırıb. Bu bir tərəfdən yeni hərbi texnika və silahların alınması ilə bağlıdırsa, digər tərəfdən Ali Baş Komandan cənab İlham Əliyevin bu sahəyə göstərdiyi diqqət və qayğı ilə əlaqədardır. Müzəffər Ali Baş Komandan cənab İlham Əliyevin siyasi kursunun ən başlıca istiqamətlərindən biri məhz ordunun hərbi qüdrətinin artırılmasıdır. Çıxışçılar Azərbaycan Ordusunun dünyada ən güclü 50 ordu sırasında olması və ordumuzun gücü haqqında məlumat veriblər.
 
Neftçala Rayon İcra Hakimiyyətinin başçısı Mirhəsən Seyidov çıxışında bildirib ki, müasir müstəqil Azərbaycanın memarı və qurucusu olan Ümummilli Lider Heydər Əliyev tərəfindən əsası qoyulan ordu quruculuğu bu gün Prezident cənab İlham Əliyev tərəfindən uğurla davam etdirilir. Ümummilli Lider Heydər Əliyevin rəhbərliyi ilə ordu quruculuğu sahəsində aparılan işlər ölkəmizdə mütəşəkkil, qüdrətli ordu yaratmağa imkan verdi, onun gələcəkdə daha da möhkəmlənməsi üçün əsaslı zəmin yaratdı. Bu gün Azərbaycan Silahlı Qüvvələri  Prezident, Ali Baş Komandan cənab İlham Əliyevin rəhbərliyi ilə – qüdrətli, müasir və döyüş qabiliyyətli bir orduya çevrilib, ordumuzun maddi bazası güclənib, yeni növ silahlar alınıb. 2020-ci ildə Vətən müharibəsində qazandığımız tarixi Qələbə məhz bu güclü ordumuzun və xalq-ordu birliyinin nəticəsi idi. RİH-in başçısı, Zəfərlə yekunlaşan 44 günlük Vətən müharibəsindən sonra bölgədə yaranan yeni geosiyasi reallıqlar fonunda Müzəffər Ali Baş Komandan İlham Əliyevin tarixi ədalətin bərpa edilməsi konsepsiyasının davamının məcburi köçkünlərin və qaçqınların Böyük Qayıdışını təmin etmək olduğunu bildirib. O, həmçinin Azərbaycan xalqının milli-mənəvi dəyərlərini və haqqını bərpa etmək missiyasının önəmindən danışıb. Müzəffər Ali Baş Komandan cənab İlham Əliyevin Qərbi Azərbaycan İcmasının üzvləri ilə görüşdə bununla bağlı ciddi tapşırıqlar verdiyini vurğulayıb. Həmçinin, Azərbaycan xalqının haqqının bərpa olunması və Qərbi Azərbaycan İcmasının hüquqlarının beynəlxalq səviyyədə tanıdılması istiqamətində ölkə rəhbərinin sərgilədiyi mövqeyin tarixçilər və hüquqşünaslar üçün ciddi vəzifələr qoyduğunu qeyd edib.
 
Neftçala RİH-in başçısı, Neftçala rayonunda həyata keçirilən yenidənqurma işləri barədə görüş iştirakçılarına məlumat verib.
 
Səyyar qəbul zamanı vətəndaşlar, kənddaxili yolların təmiri, küçə işıqlanması, yol nişanları və digər məsələlər üzrə müraciətlərini irəli sürüblər. Vətəndaşların müraciətləri ayrı-ayrılıqda dinlənilib, məsələlər müzakirə edilib və həll olunması üçün aidiyyəti üzrə tapşırıqlar verilib.
 
Vətəndaşlar göstərilən yüksək diqqət və qayğıya, həmçinin rayon ərazisində aparılan abadlıq-quruculuq işlərinə görə Azərbaycan Respublikasının Prezidenti cənab İlham Əliyev və Birinci vitse-prezident Mehriban xanım Əliyevaya minnətdarlıqlarını ifadə ediblər.
 
Məlumat üçün bildiririk ki, vətəndaş məmnunluğunu artırmaq və xidmət keyfiyyətinin yaxşılaşdırılmasını təmin etmək məqsədilə vətəndaşlar Neftçala Rayon İcra Hakimiyyəti ilə həm onlayn, həm də yerində görüşlər üçün yaradılan "Rəqəmsal İcra Hakimiyyəti" https://rih.gov.az portalına daxil olaraq müraciət edə bilərlər.