Bayram günlərində və xüsusi əlamətdar tarixlərdə Naxçıvana səyahət etmək istəyən sərnişinlər aviabilet tapmaqda çətinlik çəkirlər.

Liderxeber.az məlumat verir ki, sərnişinlərin sözlərinə görə, xüsusilə bayram ərəfəsində biletlər sürətlə tükənir, əlavə reyslərlə bağlı məlumatlar isə ya gecikdirilir, ya da onlayn sistemlərdə əks olunmur.

Naxçıvan sakini bildirib ki, bu problem uzun illərdir davam edir. Hər bayram və qeyri-iş günləri zamanı Naxçıvana uçuş biletlərini tapmaq müşkülə çevrilib. Vaxtilə ümumiyyətlə onlayn bilet satışı mövcud olmayıb. Son illərdə bu xidmət fəaliyyətə başlasa da, hələ də əvvəlki problemlər yaşanır.

O qeyd edib ki, əlavə reyslər təyin olunsa da, bu uçuşlar üçün onlayn biletlər təqdim edilmir. Sərnişinlər AZAL-ın müştəri xidmətlərinə müraciət etdikdə isə, onlara yalnız hava limanına yaxınlaşmaq tövsiyə olunur.

Sərnişinin sözlərinə görə, bölgələrdə yaşayanlar üçün bu, əlavə çətinlik yaradır, çünki onlar Bakıya gəlmədən bilet ala bilmirlər.

Digər sərnişinlər də təyyarədə boş yerlər olduğu halda, onlayn sistemdə bu yerlərin görünmədiyini deyirlər.

Bəzi tələbələr isə əvvəlcədən bilet alsalar da, geri qayıtmaq istəyəndə yer olmadığını deyirlər. Lakin təyyarədə boş yerlər olduğunu özləri müşahidə ediblər.

"Azərbaycan Hava Yolları" Qapalı Səhmdar Cəmiyyətinin xarici və daxili kommunikasiyalar şöbəsinin rəhbəri Fərid Hüseynov şikayətlərlə bağlı bildirib ki, Bakı-Naxçıvan istiqamətində gündəlik 10-a yaxın uçuş həyata keçirilir. Bayram və xüsusi günlərdə bu say 17-yə qədər artırıla bilər.

O qeyd edib ki, sərnişin sıxlığı müşahidə olunan hallarda əlavə reyslər təyin olunur. Bu reyslər yalnız hava limanındakı kassalarda satışa çıxarılır və onlayn sistemdə görünmür. Bu yanaşma hava limanında növbədə dayanan sərnişinlərin uçuş imkanı əldə etməsinə şərait yaratmaq məqsədi daşıyır.

AZAL sərnişinlərə tövsiyə edir ki, mümkün qədər erkən tarixdə bilet alsınlar və planlarını qabaqcadan quraraq narahatlıqlardan yayınsınlar.