Liderxeber.az xəbər verir ki, bayram şənliyi Ordubad şəhərinin mərkəzi Tədbirlər meydanında təşkil olunmuş və Novruz atributları ilə bəzədilmiş xüsusi guşələrə baxışla başlayıb. Burada milli mətbəx nümunələri, xalq sənətkarlığı məmulatları və müxtəlif kənd təsərrüfatı məhsulları sərgilənib.

Tədbirin əvvəlində Novruz adətinə uyğun olaraq Dədə Qorqud və Bahar qızı tədbir iştirakçılarını salamlayaraq xeyir-dua verib, Novruzun xalqımıza uğur, bol ruzi-bərəkət, sülh və əmin-amanlıq gətirməsini arzulayıb. Daha sonra Novruz bayramının xalqımızın mədəni irsindəki əhəmiyyətindən, birliyimizi və həmrəyliyimizi daha da gücləndirən dəyərlərindən danışılıb. Novruzun baharın gəlişini, təbiətin yenilənməsini, sülhü və firavanlığı tərənnüm etdiyi qeyd olunub. Bayram tonqalı yandırılıb.

Bayram proqramı çərçivəsində rayonun incəsənət ustaları və folklor kollektivlərinin iştirakı ilə geniş bayram konserti təqdim olunub. Milli musiqilər, rəqslər və səhnəciklər bayramın coşqu dolu ab-havasını daha da artırıb. Uşaq-Gənclər İdman Məktəbinin gimnast və idmançılarının xüsusi nömrələri tamaşaçılar tərəfindən maraqla qarşılanıb. Novruzun əsas simalarından olan Kosa və Keçəlin şən zarafatları və əyləncəli çıxışları tədbirə xüsusi rəng qatıb.

Tədbirin diqqətçəkən məqamlarından biri də Ordubada məxsus qədim “Xan bəzəmə” mərasiminin təqdim edilməsi olub. Bu mərasimdə Novruz bayramı ilə bağlı xalqın məişət və dünya görüşünü əks etdirən maraqlı epizodlar canlandırılıb. Səhnədə Xan, Vəzir və Cəllad və digər obrazların iştirakı ilə dramatik və komik elementlərin sintez olunduğu tamaşa nümayiş etdirilib. Xalq arasında ənənəvi olaraq həyata keçirilən bu mərasim, həm də ədalət, hikmət və xalqın birliyinin rəmzi kimi təqdim olunub.

Bayram tədbiri yüksək əhvali-ruhiyyə şəraitində keçirilib və xalqımıza sülh, əmin-amanlıq, firavanlıq arzuları ifadə olunaraq yekunlaşıb.