"Azərbaycan xalqı çox gözəl xalqdır. Məni çox istədiklərinə görə onlara təşəkkür edirəm. 50 ildir ki, sənətimlə xidmət edirəm.

Bu illər ərzində çox şükür olsun Allaha ki, mənə qarşı sevgi artdı ki, azalmadı. Xalqımız sənətkarlarına dəyər verir. Mən düşünürəm ki, sən öz işini, sənətini, şəxsiyyətini sevəndə, qiymət verəndə xalq da səni sevir və dəyər verir".

Liderxeber.az xəbər verir ki, bunu Xalq artisti, professor, "Şöhrət" ordenli Səkinə İsmayılova deyib.

70 illik yubileyini qeyd edən sənətkar efirlərə nadir hallarda çıxdığını bildirib:

"İllərdir ki, mən efirlərə getmirəm. Dəvət edirlər, çox deyirlər, israr edirlər, ürəklərini qırmamaq üçün deyirəm ki, "İnşallah ad günümdə". Fevral ayının əvvəlindən axırına qədər mənim doğum günüm qeyd olunur. Dəyər verdiyim, istədiyim, qabiliyyətinə bələd olduğum aparıcıların verilişlərinə gedirəm. Bu il də fevral ayının əvvəlindən efirdə doğum günümü qeyd etməyə başlayıblar".

Xanım xanəndə sənəti hər zaman qoruduğunu bildirib:

"Allaha çox şükür ki, sənətlə bağlı elə bir arzum yoxdur. Həmişə sənətin düzgün istiqamətdə inkişaf etməsinə, Azərbaycan muğamının klassik ifa üslubunu qoruyaraq ona xidmət etmişəm. Zaman-zaman kimlərsə yolunu azanda onlara məsləhət verdim, onları bu yoldan çıxmamağa çağırdım. Çünki klassiklərdən, böyük sənətkarlardan bizə gələn muğamı zədələməyə ixtiyarımız yoxdur. Biz onu olduğu kimi də gələcək nəsillərə çatdırmağa çalışmalıyıq. Mən muğamı düzgün istiqamətdə təbliğ etdiyim üçün, hər zaman fərəh hissi keçirmişəm. Bu gün də sənətə xidmət edirəm. Azərbaycan Dövlət Mədəniyyət və İncəsənət universitetində dərs deyirəm, tələbələr yetişdirirəm. Bu da əlbəttə ki, məni sevindirir. Muğamımızın gələcəyi bizim gənclərin əlindədir".