İşğaldan azad olunan Füzuli rayonunda genişmiqyaslı bərpa və quruculuq işləri sürətlə davam etdirilir. Prezident İlham Əliyevin rəhbərliyi ilə həyata keçirilən "Böyük Qayıdış" Proqramı çərçivəsində rayonun şəhərlə yanaşı, kəndləri də yenidən qurulur, müasir infrastruktur yaradılır. Hazırda bu işlər Füzuli rayonunun zəngin tarixə malik Pirəhmədli kəndində də uğurla davam etdirilir.

Pirəhmədli kəndinin adına hələ Səfəvilər dövləti dövründə rast gəlinir. Daha sonrakı dövrdə isə kənd xanlıqlar zamanı Qarabağ xanlığının Xırdapara Dizaq mahalının bir müddət başkəndi olub. Zəngin keçmişə malik bu yaşayış məntəqəsi işğal dövründə tamamilə dağıdılıb, kənddə demək olar ki, daş-daş üstə qalmayıb. Azərbaycan Ordusunun 2020-ci ildə qazandığı tarixi Zəfər nəticəsində Pirəhmədli də digər yaşayış yerləri kimi işğaldan azad edilib və bu gün kənd yenidən dirçələrək müasir simada qurulur.

Ağdam, Füzuli və Xocavənd rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsinin müdiri Təranə Quliyeva bildirib ki, Füzuli rayonunun Pirəhmədli kəndində həyata keçirilən yenidənqurma layihəsi üzrə tikinti işləri planlaşdırılmış qrafikə uyğun davam etdirilir. Layihə çərçivəsində kəndin müasir yaşayış məntəqəsi kimi formalaşdırılması, sakinlərin rahat və təhlükəsiz yaşayış şəraiti ilə təmin olunması nəzərdə tutulur.

"Ümumilikdə layihə 89,63 hektardan çox ərazini əhatə edir və burada 347 ədəd fərdi yaşayış evinin inşası nəzərdə tutulub. Eyni zamanda, 277 mənzilli, 4 mərtəbəli 8 yaşayış binasının tikintisi də planlaşdırılır. İlkin mərhələdə layihələndirilən ərazinin sahəsi 74,69 hektar təşkil edir. İnşası nəzərdə tutulan 280 fərdi yaşayış evindən 146-sının ilin sonunadək yekunlaşdırılması planlaşdırılır.

Birinci mərhələdə 280 ailənin kəndə köçürülməsi nəzərdə tutulur. Hazırda fərdi yaşayış evləri ilə yanaşı, məktəb, uşaq bağçası, tibb məntəqəsi və inzibati bina kimi sosial təyinatlı obyektlərin tikintisi davam edir. Eyni zamanda, kənddaxili yolların, mühəndis-kommunikasiya xətlərinin və digər infrastruktur layihələrinin icrası istiqamətində hazırlıq işləri aparılır. Məqsəd Pirəhmədli sakinlərinin doğma yurdlarına ən qısa zamanda təhlükəsiz və rahat qayıdışını təmin etməkdir".

Kəndin tikinti işlərində çalışan Füzuli sakini Mobil Əliyev deyir ki, Ali Baş Komandan İlham Əliyevin rəhbərliyi ilə Azərbaycan Ordusu xalqımıza tarixi Zəfər sevincini yaşadıb: "30 illik həsrətimizə son qoyuldu. Bu torpaqlar uğrunda canlarını fəda edən şəhidlərimizin ruhu şad olsun, qazilərimizə Allahdan cansağlığı diləyirəm. Ölkə rəhbərimiz İlham Əliyevə minnətdarıq. Şəhidlərimizin bizə əmanət qoyduğu azad olunmuş torpaqlar bu gün yenidən qurulur.

Mən də bir Füzuli sakini olaraq doğma rayonumda qürur və fəxrlə çalışıram. Pirəhmədli kəndi işğal dövründə tamamilə viran edilmişdi, burada daş-daş üstə qalmamışdı. Artıq 8 aydır ki, burada çalışıram. Dövlətimizin həyata keçirdiyi quruculuq işləri nəticəsində Pirəhmədli yenidən dirçəlir, müasir evlər, sosial obyektlər tikilir. Bu quruculuq prosesində mənim də əməyimin olması qürurvericidir". (Azərtac)