Dekabrın 24-də "BOS Shelf International FZCO" şirkətinin Azərbaycan filialına məxsus nəqliyyat vasitələri 2-ci dəfə təkrar olaraq 10 faiz endirimlə hərraca çıxarılacaq.

Liderxeber.az Əmlak Məsələləri Dövlət Xidmətinə istinadən xəbər verir ki, hərraca müxtəlif minik avtomobilləri - əsasən "Hyundai Santa Fe", "Toyota Prado", "Toyota Land Cruiser" və "Audi A6" təqdim edilir.

Hərraca çıxarılan ən ucuz nəqliyyat vasitəsi 2014-cü il istehsalı olan "Hyundai Santa Fe" minik avtomobilidir. Bu nəqliyyat vasitəsinin ilkin satış qiyməti 14 min 109.3 manatdır.

Siyahıda ən yüksək qiymətə hərraca çıxarılan avtomobil isə 2014-cü il buraxılışı olan "Toyota LC 200" nəqliyyat vasitəsidir. Bu avtomobilin ilkin satış qiyməti 45 min 934.2 manatdır.

Ümumilikdə hərraca çıxarılan avtomobillərin böyük hissəsi 2014-2016-cı illər istehsalıdır və satış qiymətləri endirim tətbiq olunduqdan sonra fərqli aralıqlarda dəyişir.

Siyahıda ümumilikdə 84 avtomobil var.

"BOS Shelf International FZCO" şirkəti, Azərbaycanda dəniz neft və qaz yataqları üçün dərin su platformaları (jaketlər və üst qatları) tikintisi üzrə ixtisaslaşıb. Şirkət 2001-ci ildə Azərbaycan Respublikası Dövlət Neft Şirkəti (SOCAR) və "Star Gulf FZCO" tərəfindən təsis edilib. Əsasən "Azəri", "Çıraq" və "Gülüstan" yataqları kimi dəniz layihələrində iştirak edib.