Azərbaycan ABŞ-nin Meyn ştatının Portland şəhərində keçirilən Millətlər Festivalında ("Festival of Nations") təmsil olunub.

Liderxeber.az-ın ABŞ bürosu xəbər verir ki, hər il keçirilən ənənəvi festivalda ölkəmizi Meyn Azərbaycan Cəmiyyətinin nümayəndələri təmsil edib.

Təşkilatın rəhbəri Tərlan Əhmədov "Report"a bildirib ki, artıq 22 ildir keçirilən keçilən festivalda dünyanın 30-dan çox ölkəsindən, eləcə də kiçik ada dövlətlərindən, müxtəlif etnik xalqlardan olan nümayəndələr iştirak edirlər. Təmsilçilər festivalda milli adət-ənənələrini, milli mətbəxlərinin ləziz təamlarını, geyimlərini, musiqilərini və mədəniyyətlərini nümayiş etdiriblər.

Festivalda Azərbaycan guşəsində qonaqlara ölkəmizin qədim tarixi və zəngin mədəniyyəti barədə ətraflı məlumat verilib. Bayraqlarımız və milli atributlarımızla bəzədilən Azərbaycan güşəsində qonaqlara icma üzvləri tərəfindən mətbəximizin ləziz təamları (plov, kabab, şəkərbura, paxlava) təqdim olunub.

Milli geyimlərdə olan azərbaycanlı uşaqların nümayiş etdiriyi milli rəqslər qonaqlar tərəfindən böyük maraqla qarşılanıb. Bununla yanaşı, güşəyə milli geyimlərimizin əks olunduğu lövhələr qoyulub ki, festival ziyarətçiləri həmin lövhələrin önündə şəkil çəkdiriblər.

Festivalda Azərbaycan musiqisi də ifa olunub. Gün ərzində ən çox ziyarətçini qəbul edən Azərbaycan güşəsinə maraq yüksək olub. Qonaqlar guşədə yüksək əhval-ruhiyyə ilə vaxt keçiriblər.