Sidney Universitetinin alimləri qlioblastoma (beyin şişinin bir növü) olan insanlarda immun hüceyrələri modifikasiya edərək onların xərçəng hüceyrələrinə hücum qabiliyyətini artırıblar.

Liderxeber.az-ın məlumatına görə, tədqiqatın nəticələri "Nature Medicine" (NatMed) jurnalında dərc olunub.

Qlioblastoma ən təhlükəli xərçəng növlərindən biri hesab olunur. Əksər xəstələr diaqnoz qoyulduqdan sonra bir ildən və ya ən yaxşı halda bir il yarımdan çox yaşamır, çünki xəstəlik gizli şəkildə inkişaf edir və çox vaxt gec mərhələdə aşkarlanır.

Yeni müalicə metodunun əsasını CAR-T terapiyası təşkil edir. Bu texnologiya immun sistemin hüceyrələrinin (T-limfositlərin) orqanizmdən çıxarılmasına, onlara şiş əleyhinə xüsusiyyətlərin verilməsi üçün genetik modifikasiyasına və daha sonra xəstəyə yeridilməsinə əsaslanır.

CAR-T terapiyası artıq qan xərçənginin müalicəsində istifadə olunsa da, bu günə qədər qlioblastoma kimi bərk şişlərin müalicəsində yaxşı nəticələr göstərməyib. Bu, həmin şişlərin müxtəlif mutasiyalara malik hüceyrələrdən ibarət olması ilə bağlıdır, halbuki CAR-T terapiyası adətən yalnız bir mutasiya növünə qarşı mübarizə aparır.

Yeni yanaşma CAR-T terapiyasının immun T-hüceyrələrdən istifadə ilə birləşməsini nəzərdə tutur. Bu, orqanizmin qlioblastomanın əksər növləri üçün xarakterik olan EGFR zülalına hücum etməsinə imkan yaradır.

Eksperiment çərçivəsində altı xəstəyə dərman beyini yuyan onurğa-beyin mayesinə yeridilib. Bu, bəzi xəstələrdə şişin ölçülərinin sürətlə kiçilməsinə səbəb olub. Yalnız bir iştirakçıda xəstəlik yenidən qayıdıb və təkrar müalicə nəticə verməyib.

Alimlər ümid edirlər ki, gələcək tədqiqatlar və klinik sınaqlar metodun təkmilləşdirilməsinə və qlioblastoma xəstələrinin ömrünün uzadılmasına kömək edəcək