“Məbəs” sözü ərəb dilində “besət” (bisət) kökündəndir, “göndərilmə” mənasını verir.

Dini terminologiyada Həzrət Muhəmmədin (s) peyğəmbərliyə göndərildiyi, yəni Allah tərəfindən peyğəmbər seçildiyi günü bu cür adlandırırlar. Daha çox şiə dünyasında mübarək rəcəb ayının 27-si Məbəs bayramı kimi qeyd edilir. Şiə mənbələrinə görə, rəcəb ayının 27-sinə keçən gecə Allah-Taala 40 yaşlı Həzrət Muhəmmədə (s) onun peyğəmbər olduğunu işarələrlə bildirmişdir. Miladi təqvimlə təqribən 610-cu ildə baş vermiş bu hadisəni bəzən İslam tarixində dönüş nöqtəsi kimi qəbul edirlər. Belə ki, İslamın ilk dövrlərində baş vermiş hadisələri çox zaman “besətdən əvvəl” və “besətdən sonra” olmaqla iki qismə bölürlər. Daha sonralar bu bölgünün əsası olaraq peyğəmbərin Məkkədən Mədinəyə hicrət etmə hadisəsi götürülmüşdür.

Əhli-sünnə aləmində rəcəb ayının 27-ci gecəsi adətən merac hadisəsinin ildönümü kimi qeyd edilir, bu münasibətlə keçirilən bayram tədbirlərinə “merac kandili” deyilir.