Saçların sağlamlığını və gözəlliyini qorumaq üçün qaynar su ilə duş qəbul etməkdən çəkinmək tövsiyə olunur.

Liderxeber.az xəbər verir ki, bu barədə ətriyyat və kosmetika məhsulları üzrə mütəxəssis Anastasiya Fomina Gazeta.ru-ya müsahibəsində danışıb.

Mütəxəssisin sözlərinə görə, həddindən artıq isti su baş dərisinin qoruyucu lipid qatını zədələyərək onu daha tez qurudur. Nəticədə dəridə quruluq, həssaslıq və qabıqlanma yarana bilər. Bundan əlavə, zədələnmiş saç telləri qaynar su ilə yuyulduqdan sonra daha sərt, kövrək və cansız görünür.

Fomina bildirib ki, saçları yumaq üçün ən uyğun seçim ilıq sudur. Onun sözlərinə görə, çox soyuq su da tövsiyə edilmir.

Ekspert vurğulayıb ki, saçların yuyulma tezliyi baş dərisinin ehtiyacına uyğun müəyyən edilməlidir. O, həmçinin şampunun saçın bütün uzunluğu boyunca deyil, əsasən baş dərisinə tətbiq edilməsini məsləhət görüb.

Mütəxəssis ev şəraitində istifadə olunan saç baxım vasitələrinin tərkibinin diqqətlə öyrənilməsinin vacibliyini də qeyd edib.

Fominanın sözlərinə görə, quru və zədələnmiş saçlar üçün üç mərhələli qulluq sistemi daha effektivdir. Bu sistemə şampun, hər yumadan sonra istifadə olunan balzam və həftədə bir və ya iki dəfə tətbiq edilən saç maskası daxildir.

O bildirib ki, balzam gündəlik istifadə üçün nəzərdə tutulmuş yüngül qulluq vasitəsidir. Saç maskasının tərkibi isə daha zəngin olduğundan güclü təsir göstərir. Lakin ondan həddindən artıq istifadə saçları ağırlaşdıra bilər. Buna görə də maskanı həftədə bir və ya iki dəfə tətbiq etmək kifayətdir.

Anastasiya Fomina yaş saçları dəsmalla sürtməyin də düzgün olmadığını bildirib. Onun sözlərinə görə, əvvəlcə saçdakı su əllə yüngülcə sıxılmalı, daha sonra isə saçlar dəsmalla sürtülmədən ehtiyatla qurudulmalıdır. Bunun üçün hamar pambıq dəsmaldan istifadə etmək daha məqsədəuyğundur.

Ekspert saçları fenlə qurudarkən cihazı təxminən 15 santimetr məsafədə saxlamağı, orta istilik rejimindən istifadə etməyi, havanı köklərdən uclara doğru yönəltməyi və eyni nöqtəyə uzun müddət isti hava verməməyi tövsiyə edib.

Mütəxəssis sonda nəm saçlarla yatmağın da zərərli olduğunu bildirib. Onun sözlərinə görə, bu halda saç telləri daha çox sürtünür, dolaşır və qırılmağa meyilli olur.