"Yuxuda arıqlamağa kömək edən məhsullar mövcud deyil, çünki çəki itirmək üçün gündəlik ümumi kalori çatışmazlığı vacibdir".

Liderxeber.az xəbər verir ki, bunu Gazeta.ru-ya rusiyalı məşqçi-nutrisioloq Yuri Brabeçan bildirib.

"İnternet "yatmazdan nələrisə yeyin və yüngülləşmiş kimi oyanın" kimi məsləhətlərlə doludur. Çox vaxt əsas rolda yumurta, qatıq, qreypfrut və ya ananas olur. Yumurta, doğrudan da, zülal və yağlar hesabına insanı yaxşı doyurur, yəni axşam peçenyeyə və şirniyyata əl uzatmamağa kömək edir. Adi kolbasalı buterbrodları bir cüt qaynadılmış yumurta ilə xiyara dəyişən insan avtomatik olaraq şam yeməyinin kalorilik dəyərini azaldır", - deyə mütəxəssis bildirib.

Məşqçi qeyd edib ki, axşamlar insanlar çox vaxt kalori normasını unudaraq yeməkdə özlərini məhdudlaşdırmırlar. Onun sözlərinə görə, yatmazdan əvvəl toxluğu təmin edən zülallı və lifli qida yemək daha yaxşıdır:

"Orqanizm axşam saat səkkizdən sonra "hər şeyi yağa çevir" rejiminə keçmir. Bədən balansı gün ərzində və uzun müddət ərzində hesablayır. Gecə qəlyanaltılarının problemi adətən tamam başqa şeydədir. Gün ərzində insan az yeyir və ya xırda qəlyanaltılarla keçinir, axşam isə bütün məhdudiyyətləri götürür. Çörək, pendir, şirniyyat asanlıqla 500-1 000 kkal əlavə edir və artıq heç bir defisitdən söhbət gedə bilməz. Axşam həqiqətən yemək istəyirsinizsə, tərəvəzli zülal seçmək lazımdır: göyərtili azyağlı kəsmik, bir tikə balıq və ya quş əti, az miqdarda giləmeyvəli təbii yoqurt. Zülal toxluğu təmin edir, lif minimum kalori ilə həcm əlavə edir. İki yumurtada təxminən 140-160 kkal var, lakin çörək, pendir və mayonez əlavə etdikdə rəqəm 300-ə qalxır. Bütün bunlar gündəlik kalori qəbulu nəzarət altında qaldığı müddətcə qidaya normal daxil olur".