Amerikalı alimlər müəyyən ediblər ki, qlütamatın qəbulu azaldıldıqda miqren tutmalarının tezliyi aşağı düşür.

Liderxeber.az xəbər verir ki, tədqiqatın nəticələri nevroloqların San-Dieqoda keçirilən illik toplantısında təqdim olunub.

Qlütamat ləzzət artırıcıların əsas komponentidir. Bu maddə həm pəhriz qidalarından, həm də pomidor və göbələk kimi tərəvəzlərdən orqanizmə daxil olur, sinir sistemində ağrı siqnallarının ötürülməsində iştirak edir və beynin həssaslığının artmasında mümkün amil hesab olunur.

Tədqiqatda 1990-1991-ci illər Körfəz müharibəsinin veteranları iştirak ediblər. Onlar digər insanlarla müqayisədə miqrendən daha çox əziyyət çəkirlər.

İlkin MRT müayinəsi iştirakçıların sağ görmə korteksinin qalınlığında artım olduğunu göstərib. Bu beyin sahəsi vizual məlumatların emalı ilə əlaqəlidir və miqrenin yaranmasında rol oynayır.

Araşdırmanın ikinci mərhələsində iştirakçılar azqlütamatlı pəhrizə keçiblər. Bir ay sonra aparılan təkrar müayinələrdə görmə korteksinin qalınlığında və miqren tutmalarının tezliyində ciddi azalma qeydə alınıb. Əgər pəhrizdən əvvəl iştirakçıların yarıdan çoxu miqren yaşayırdısa, bir ay sonra bu göstərici cəmi 20 faizə enib. Eyni zamanda xroniki ağrı, yorğunluq, əhval problemləri və idrak çətinlikləri də azalıb.

Alimlər bu pəhrizin ümumilikdə bütün miqren xəstələri üçün faydalı ola biləcəyini düşünürlər. Hazırda pəhrizin təsir mexanizmlərini və qlütamat həssaslığının artmasında qan-beyin baryerinin rolunu müəyyənləşdirmək üçün əlavə tədqiqatlar aparılır.