"Payızda gün işığı saatlarının azalması, temperatur dəyişiklikləri və D vitamininin səviyyəsinin aşağı düşməsi səbəbindən bir çox insan yorğunluq və immunitetin zəifləməsini hiss edir".

Liderxeber.az xəbər verir ki, bunu "İzvestiya" nəşrinə rusiyalı terapevt İrina Çikalkina deyib.

Onun sözlərinə görə, payızda immuniteti gücləndirməyə kömək edən maddələri qidadan almaq xüsusilə vacibdir:

"Balıq və dəniz məhsulları omeqa-3 yağ turşuları, yod, sink və selenlə zəngindir. Bu elementlər iltihab proseslərini azaldır, maddələr mübadiləsini yaxşılaşdırır və ürək-damar sisteminin işini dəstəkləyir. Yağlı balıq D vitamininin azsaylı təbii mənbələrindən biridir. Soyuq havaların başlaması ilə bu vitaminin dəridə sintezi təxminən 80% azalır, buna görə də tez-tez qızılbalıq, skumbriya və ya tuna balığı qəbul etmək mövsümi vitamin çatışmazlığını kompensasiya etməyə və virus infeksiyalarının riskini azaltmağa kömək edir".

Terapevt vurğulayıb ki, həftədə iki-üç dəfə balıq və dəniz məhsulları yemək optimal sayılır.

Çikalkina yüngül axşam yeməyi üçün yağlı sousları olmayan və minimum miqdarda düyü olan rolları, həmçinin dəniz məhsulları olan salatları və ya sobada bişirilmiş balığı tərəvəzlərlə tövsiyə edir.