Hazırda Rusiya Prezidenti Vladimir Putinlə Qərb ölkələrinin liderləri arasında görüşə ehtiyac yoxdur, elə bir ehtiyac yarananda təmaslar baş tutacaq.

Bu barədə Rusiya Prezidentinin mətbuat katibi Dmitri Peskov Putinin “G20”nin son sammitində şəxsən iştirakdan imtina etməsini şərh edərkən bildirib.

“Putinin indi bu insanlarla görüşünə ehtiyacı yoxdur, çünki bu görüş bizim gündəliyimizə konstruktiv heç nə əlavə edə bilməz", - sözçü vurğulayıb.

Kremlin rəsmisi diqqətə çatdırıb ki, Putinin beynəlxalq cədvəli “çox, çox aktivdir, lakin konstruktiv olan və Rusiyanın maraqlarına cavab verən istiqamətlərdədir”.

“Sözügedən centlmenlərlə görüşmək vaxtı gələndə bu, mütləq həyata keçiriləcək”, - o söyləyib.

Xatırladaq ki, daha öncə Braziliya Prezidenti Luis İnasiu Lula da Silva rusiyalı həmkarı Vladimir Putinin 2024-cü ildə ölkəsinin Rio-de-Janeyro şəhərində keçiriləcək G20 sammitində iştirak edəcəyi təqdirdə, həbs olunmayacağını bildirib.

Qeyd edək ki, 2023-cü il martın 17-də Beynəlxalq Cinayət Məhkəməsi Rusiya Prezidenti Vladimir Putin və Prezidentin Uşaq Hüquqları üzrə Müvəkkili Mariya Lvova-Belovanın ukraynalı uşaqları Rusiyaya qanunsuz deportasiya etməkdə şübhəli bilərək həbsinə order verib. Bu səbəbdən Rusiya liderinin xaricə, xüsusən də Qərbə səfərləri əhəmiyyətli dərəcədə məhdudlaşıb.