Sizin reklam burada
Elvin Paşayev ali məktəbə qəbul olmuş şəhid övladını təbrik edib
Göygöl rayonundan olan vətən müharibə şəhidi Ceyhun Niftəliyevin övladı Niftəliyev Nihat Ceyhun oğlu Dövlət İmtahan Mərkəzi tərəfindən 2023/2024-cü tədris ili üçün bakalavr səviyyəsi üzrə ali təhsil müəssisələrinə aparılan müsabiqənin nəticələrinə görə yüksək nəticə əldə edərək Azərbaycan Tibb Universitetinə qəbul olub.
Göygöl Rayon İcra Hakimiyyətinin başçısı Elvin Paşayev şəhid övladı Nihat Niftəliyevlə yaşadığı evində görüşüb, onu tələbə adını qazanması münasibəti ilə təbrik edib, gələcək həyatında uğurlar arzulayıb və qeyd edib ki, tələbə adı dəyərli, məsuliyyətli və qürurvericidir, o ad 11 illik əməyin, zəhmətin və iradənin bəhrəsidir. Eyni zamanda, bildirib ki, şəhid və qazi ailələri, onların övladları dövlətin xüsusi diqqət və qayğısı ilə əhatə olunur. Çünki şəhid övladları Vətənə əmanətdir. Sonra şəhid övladına xatirə hədiyyəsi təqdim edilib.
Görüşdə şəhidin ailə üzvləri, Göygöl Rayon İcra hakimiyyəti başçısı Aparatının məsul əməkdaşları, Göygöl rayon üzrə Təhsil sektorunun rəhbəri və Göygöl rayon Texniki-təbiət fənləri təmayüllü liseyin direktoru iştirak edib. Şəhidin ailə üzvləri onlara göstərilən diqqət və qayğıya görə təşəkkürlərini bildiriblər.
Görüşün sonda xatirə fotosu çəkdirilib.
