ABŞ ilə Azərbaycan arasında strateji tərəfdaşlıq çərçivəsində həyata keçirilən layihələr iki ölkə arasında qarşılıqlı etimadın, siyasi iradənin və uzunmüddətli əməkdaşlıq baxışının göstəricisidir.  

ABŞ-ın Vitse-prezidenti Cey. Di. Vensin bu günlərdə Azərbaycana etdiyi rəsmi səfər tarixi hadisələrlə yadda qaldı.  Azərbaycan Respublikasının Prezidenti cənab İlham Əliyev ali qonağın səfəri zamanı mətbuata verdiyi bəyanatında Tramp–Vens administrasiyasının regionda həyata keçirdiyi təşəbbüslərin artıq real və mühüm nəticələr verdiyini xüsusi vurğuladı. Dövlət başçısı qeyd etdi ki, bu səylərin ən əhəmiyyətli nəticələrindən biri Beynəlxalq Sülh və Rifah naminə Tramp Marşrutu – TRIPP layihəsidir. Bu təşəbbüs təkcə nəqliyyat və logistika baxımından deyil, həm də siyasi və iqtisadi sabitlik baxımından region üçün yeni perspektivlər açır.

Ölkə başçısı ABŞ Hökumətinə regionda sülhün və əməkdaşlığın təşviqi istiqamətində göstərdiyi böyük töhfəyə görə minnətdarlığını ifadə etdi. Bildirdi ki, Azərbaycan konstruktiv mövqe nümayiş etdirərək regionda etimad mühitinin formalaşmasına real addımlarla dəstək verir. Bu çərçivədə Azərbaycan öz ərazisi vasitəsilə Ermənistana gedən yüklərin tranzitinə qoyulmuş bütün məhdudiyyətləri aradan qaldırıb. Bununla yanaşı, Azərbaycan tərəfindən Ermənistana neft məhsullarının təchizatına başlanılması mühüm etimad quruculuğu addımı kimi qiymətləndirilir.

Bu qərarlar regionda qarşılıqlı asılılıq və iqtisadi əməkdaşlıq mühitini gücləndirərək sülh prosesinə praktik məzmun verir. Dövlət başçısı TRIPP layihəsini strateji əhəmiyyətə malik beynəlxalq nəqliyyat təşəbbüsü adlandıraraq marşrutun Azərbaycanın əsas hissəsi ilə Naxçıvanı birləşdirməklə yanaşı, eyni zamanda Azərbaycan, Ermənistan və digər qonşu ölkələrin ərazilərindən keçərək Asiya ilə Avropanı birləşdirəcək etibarlı, təhlükəsiz və böyükmiqyaslı daşımalar dəhlizi rolunu oynayacağına diqqət çəkdi.  Göründüyü kimi layihə yalnız regional deyil, qlobal əhəmiyyət daşıyır və Avrasiya məkanında yeni iqtisadi dinamikanın formalaşmasına töhfə verəcək. Prezident İlham Əliyev bəyanatında bu cür irimiqyaslı infrastruktur və əməkdaşlıq təşəbbüslərinin regionda əldə olunmuş sülh nəticələrini daha da möhkəmləndirdiyini xüsusi vurğuladı.

Reallıq budur ki, ABŞ ilə Azərbaycan arasında münasibətlər tamamilə yeni mərhələyə qədəm qoyur. Strateji tərəfdaşlıq çərçivəsində həyata keçirilən layihələr iki ölkə arasında qarşılıqlı etimadın, siyasi iradənin və uzunmüddətli əməkdaşlıq baxışının göstəricisidir.  

Beləliklə, cənab Prezident İlham Əliyevin səsləndirdiyi fikirlər göstərir ki, regionda sülh və əməkdaşlıq artıq konkret layihələr və real iqtisadi təşəbbüslərlə möhkəmləndirilir. TRIPP layihəsi isə bu yeni mərhələnin simvoluna çevrilərək həm regional inteqrasiyanın, həm də Azərbaycan–ABŞ münasibətlərinin strateji səviyyədə inkişafının bariz nümunəsi kimi çıxış edir.

Valeh Hətəmov
Neftçala rayonu