“Qələbəmizin qazanılması, məhz birliyimizin, misilsiz gücümüzün nəticəsidir. Xalqımız birləşərək bu Qələbəni şərtləndirdi”!

44 günlük Vətən müharibəsi çoxəsrlik tarixə malik Azərbaycan xalqının yaddaşında  fərqli çalarlar, qürurverici məqamlarla iz qoymuşdur. Bu haqq savaşında vətən övladlarının hər birinin göstərdiyi saysız rəşadət və igidlik, unudulmaz qəhrəmanlıq dastanına çevrilmiş, yaddaşlara əbədi olaraq həkk olunmuşdur. Hünər meydanında tarix yazan oğullar, qısa zaman kəsiyində xalqımızı Müzəffər qılaraq, Azərbaycanı haqq savaşından tarixi Zəfərlə çıxarmağa müvəffəq oldular. Bununla da, ölkəmizin gücünü, qüvvətini, sarsılmaz xalq-dövlət birliyini, millətin qeyrətini, oğulların Vətən məhəbbətini bütün dünyaya sübut etdilər.

Müharibənin hələ ilk günlərindən xalq öz dövlətinin, Liderinin ətrafında sıx birləşdi və bu birlik, ümumxalq həmrəyliyinə çevrilərək, düşmənə yönələn sarsıdıcı gücə, “Dəmir Yumruğa” çevrildi.   Məhz bu gücdən, birlikdən qaynaqlanan Böyük Zəfərimizin təntənəsi, “Dəmir Yumruq” sayəsində gerçəkləşdi. Müzəffər Ali Baş Komandan cənab İlham Əliyev xalqın dəstəyini və gücünü qiymətləndirərək belə demişdir: “Bizi irəliyə aparan milli ruh bu Qələbəni təmin etdi”.

Vətən Müharibəsinin ilk günündən ölkənin hər  bir vətəndaşı, uşaqdan-böyüyə, qocadan-cavana, əsgərindən mülki vətəndaşına qədər hər kəs, sınaq meydanına atıldı, şərəfli bir yolun yolçusuna çevrildi.  İllər uzunu gözlədiyi haqq savaşının “müsəlləh əsgəri” kimi, “hər şey Vətən üçün” şüarı ilə bu çətin imtahandan alnıaçıq, üzüağ çıxmaq üçün cəsarət, mərdlik göstərdi. Dinindən, milliyətindən asılı olmayaraq minlərlə Azərbaycan gənci, düşmən işğalına son qoymaq, Qarabağın azadlığı  uğrunda  mübarizə aparmaq üçün könüllü olaraq  cəbhəyə yollandı. Arxa cəbhədə də eyni coşqu nümayiş etdirən xalqımız, Ali Baş Komandanın ətrafında sıx birləşərək, sosial mövqeyindən asılı olmayaraq, birlik, həmrəylik nümayiş etdirdi.  Haqq savaşına yollanan əsgərinə  yardım etmək üçün əlindən gələni etdi, hər cür maddi və mənəvi dəstək olmağa çalışdı. Bu sözün əsl mənasında xalq və dövlət, milli birlik və həmrəyliyin, ən əsası vətənpərvərliyin təntənəsi idi.

Ölkə başçısı cənab İlham Əliyevin rəhbərliyi ilə rəşadətli Ordumuz itirilmiş torpaqlarımızı 44 gün ərzində döyüş meydanında güc yolu ilə erməni işğalçılarından təmizlədi. Bu tarixi Zəfərlə Azərbaycan Ermənistanın torpaqlarımız üzərində 30 illik işğalına son qoydu, dünyada qalib xalq, məğlubedilməz dövlət kimi özünü təsdiqlədi, onunla hesablaşmağa,  onu dinləməyə vadar etdi.  Dövlət başçısı cənab İlham Əliyevin səriştəli diplomatiyası, iradəli siyasəti Müzəffər Ordumuzun şanını, qüdrətini göstərdi, Azərbaycanı və azərbaycanlıları  bütün dünyada tanıtdırdı.

Qətiyyətli diplomatiya və siyasi iradə göstərərək,  “Qarabağ Azərbaycandır və nida”- dedi Prezidentimiz. Bütün Azərbaycan səsinə səs verərək, öz Xilaskarının ətrafında birləşdi, milli iradəsini və milli birliyini nümayiş etdirərək, əzm və cəsarətlə Vətənin müdafiəsinə qalxdı. Hər qarış torpaq uğruna canını sipər edən oğullar, tariximizin  şanlı salnaməsini qızıl qanlarıyla yazaraq, zor gücünə qoparılmış  Qarabağımızı bizə qaytardılar.

44 günlük Vətən müharibəsini bizim şanlı tariximiz kimi dəyərləndirən Ölkə başçısı, xalqın Lideri, cənab İlham Əliyevin fikri ilə desək: “Qələbəmizin qazanılması, məhz birliyimizin, misilsiz gücümüzün nəticəsidir. Xalqımız birləşərək bu Qələbəni şərtləndirdi”. 

Filarə İsmayılova
Neftçala rayonu