Neftçala Rayon İcra Hakimiyyətinin başçısı Şorkənd kəndinin sakinləri ilə səyyar görüş keçirib.
 
Vətəndaş qəbulunda Neftçala Rayon İcra Hakimiyyətinin başçısı Mirhəsən Seyidov, RİH-in məsul şəxsləri, hüquq- mühafizə orqanlarının, idarə, müəssisə və təşkilatların rəhbərləri, şəhid ailələri, qazilər və kənd sakinləri iştirak ediblər.
 
İlk öncə, Ulu Öndər Heydər Əliyevin və Azərbaycan Respublikasının ərazi bütövlüyünün, müstəqilliyinin, konstitusiya quruluşunun müdafiəsi zamanı şəhid olan hərbi qulluqçuların ruhu bir dəqiqəlik sükutla yad edilib.
 
Cəngan kənd ərazi dairəsi üzrə nümayəndə çıxış edərək, Şorkənd kəndi haqqında görüş iştirakçılarına geniş məlumat verib.
 
Çıxışçılar “Təhsil sahəsində Heydər Əliyev Fondunun həyata keçirdiyi layihələr – Ulu Öndərin təhsil siyasətinin uğurlu davamının göstəricisidir!” mövzusunda iştirakçılara ətraflı məlumat veriblər. Bildirilib ki, Ulu Öndər Heydər Əliyev hər zaman təhsili Azərbaycanın inkişafında əsas strateji sahə kimi qiymətləndirib. Onun “Təhsil millətin gələcəyidir” fikri bu sahənin prioritet olduğunu dəfələrlə vurğuladığını göstərir. Ulu Öndərin əsasını qoyduğu təhsil siyasəti bu gün də uğurla davam etdirilir və bu davamlılığın bariz nümunələrindən biri də Heydər Əliyev Fondunun bu sahədəki çoxşaxəli fəaliyyəti ilə bağlıdır. Fondun prezidenti, Azərbaycan Respublikasının Birinci vitse-prezidenti Mehriban xanım Əliyevanın təşəbbüsü və dəstəyi ilə təhsilə göstərilən diqqət və qayğının ildən-ilə artması barədə tədbir iştirakçılarına geniş məlumat verilib.
 
Neftçala Rayon İcra Hakimiyyətinin başçısı Mirhəsən Seyidov çıxışında qeyd edib ki, Ulu Öndər Heydər Əliyev xalqın təkidi ilə siyasi hakimiyyətə qayıtdıqdan sonra, digər sahələrdə olduğu kimi, təhsil sahəsinə də xüsusi diqqət və qayğı göstərib. Onun təşəbbüsü ilə yüzlərlə gənc xarici ali təhsil müəssisələrinə göndərilərək ölkəmiz üçün yüksək ixtisaslı kadrlar hazırlanıb. Ulu Öndər tərəfindən əsası qoyulan və strateji istiqamət kimi müəyyənləşdirilən təhsil siyasəti bu gün ölkə Prezidenti cənab İlham Əliyev tərəfindən uğurla davam etdirilir. Məhz bu siyasətin davamlılığının bariz nümunələrindən biri də Heydər Əliyev Fondunun təhsil sahəsində həyata keçirdiyi genişmiqyaslı layihələrdir.
 
RİH başçısı vurğulayıb ki, Heydər Əliyev Fondu ölkəmizdə təhsilin inkişafına xüsusi önəm verən, bu istiqamətdə sistemli və məqsədyönlü fəaliyyət göstərən nüfuzlu qurumlardan biridir. Fondun prezidenti Mehriban xanım Əliyevanın təşəbbüsü ilə reallaşdırılan layihələr birbaşa təhsilin keyfiyyətinin yüksəldilməsinə, maddi-texniki bazanın gücləndirilməsinə, eləcə də təhsil alanların daha əlverişli şəraitdə tədrisə cəlb olunmasına xidmət edir. Xüsusilə “Yeniləşən Azərbaycana yeni məktəb” layihəsi çərçivəsində ölkənin şəhər və kəndlərində yüzlərlə müasir tipli məktəb binası inşa olunur, mövcud təhsil müəssisələri isə əsaslı şəkildə təmir və bərpa edilir. Fond tərəfindən xüsusi qayğıya ehtiyacı olan uşaqlar üçün yaradılan təhsil və inkişaf mərkəzləri inklüziv təhsilin inkişafına əhəmiyyətli töhfələr verir. Heydər Əliyev Fondunun dəstəyi ilə Neftçala rayonunda yerləşən Xıllı qəsəbə 1 saylı və Bankə qəsəbə 2 saylı məktəbləri yenidən inşa edilib.
 
Rayon İcra hakimiyyətinin başçısı Qərbi Azərbaycanın memarlıq abidələri ilə zəngin olmasına da xüsusi diqqət çəkib. O qeyd edib ki, İrəvan qalası, Göy məscid, Sərdar sarayı, qədim mədrəsələr, körpülər və karvansaralar bu torpaqlarda Azərbaycan mədəniyyətinin canlı izlərini bu günədək qoruyub saxlayır. Təəssüf ki, zaman-zaman baş verən siyasi hadisələr nəticəsində bu irsimizə qarşı mənimsəmə və məhv etmə cəhdləri də olub. Lakin xalqımız bu abidələrin tarixi və mənəvi dəyərini heç vaxt unutmur. Bu gün də Qərbi Azərbaycan mövzusu hər bir azərbaycanlının yaddaşında xüsusi yer tutur. Orada doğulub ata-baba yurdlarından didərgin düşmüş soydaşlarımız Müzəffər Ali Baş Komandan, Prezident cənab İlham Əliyevin rəhbərliyi ilə öz doğma torpaqlarına qayıdacaqları günü səbirsizliklə gözləyirlər.
 
RİH-in başçısı, Zəfərlə yekunlaşan 44 günlük Vətən müharibəsindən sonra bölgədə yaranan yeni geosiyasi reallıqlar fonunda Müzəffər Ali Baş Komandan İlham Əliyevin tarixi ədalətin bərpa edilməsi konsepsiyasının davamının məcburi köçkünlərin və qaçqınların Böyük Qayıdışını təmin etmək olduğunu bildirib. O, həmçinin Azərbaycan xalqının milli-mənəvi dəyərlərini və haqqını bərpa etmək missiyasının önəmindən danışıb.
 
Müzəffər Ali Baş Komandan cənab İlham Əliyevin Qərbi Azərbaycan İcmasının üzvləri ilə görüşdə bununla bağlı ciddi tapşırıqlar verdiyini vurğulayıb. Həmçinin, Azərbaycan xalqının haqqının bərpa olunması və Qərbi Azərbaycan İcmasının hüquqlarının beynəlxalq səviyyədə tanıdılması istiqamətində ölkə rəhbərinin sərgilədiyi mövqeyin tarixçilər və hüquqşünaslar üçün ciddi vəzifələr qoyduğunu qeyd edib.
 
Neftçala RİH-in başçısı, Neftçala rayonunda həyata keçirilən yenidənqurma işləri barədə görüş iştirakçılarına məlumat verib.
 
Səyyar qəbul zamanı vətəndaşlar, Şorkənd və Bala Surra kəndlərinin mavi yanacaqla, Şorkənd məktəbinin digər korpuslarının istilik sistemi ilə təmin olunması, Şorkənd-Beştalı-Bankə-Şirvanlı avtomobil yolunun təmiri, ev sənədləşməsi və digər məsələlər üzrə müraciətlərini irəli sürüblər. Vətəndaşların müraciətləri ayrı-ayrılıqda dinlənilib, məsələlər müzakirə edilib və həll olunması üçün aidiyyəti üzrə tapşırıqlar verilib.
 
Vətəndaşlar göstərilən yüksək diqqət və qayğıya, həmçinin rayon ərazisində aparılan abadlıq-quruculuq işlərinə görə Azərbaycan Respublikasının Prezidenti cənab İlham Əliyev və Birinci vitse-prezident Mehriban xanım Əliyevaya minnətdarlıqlarını ifadə ediblər.
 
Məlumat üçün bildirək ki, vətəndaş məmnunluğunu artırmaq və xidmət keyfiyyətinin yaxşılaşdırılmasını təmin etmək məqsədilə vətəndaşlar Neftçala Rayon İcra Hakimiyyəti ilə həm onlayn, həm də yerində görüşlər üçün yaradılan "Rəqəmsal İcra Hakimiyyəti" https://rih.gov.az portalına daxil olaraq müraciət edə bilərlər.