Neftçala Rayon İcra Hakimiyyətinin başçısı Mirzəqurbanlı kənd sakinləri ilə səyyar görüş keçirib.

Vətəndaş qəbulunda Neftçala Rayon İcra Hakimiyyətinin başçısı Mirhəsən Seyidov, RİH-in məsul şəxsləri, hüquq- mühafizə orqanlarının, idarə, müəssisə və təşkilatların rəhbərləri, şəhid ailələri, qazilər və kənd sakinləri iştirak ediblər.

İlk öncə, Ulu Öndər Heydər Əliyevin və Azərbaycan Respublikasının ərazi bütövlüyünün, müstəqilliyinin, konstitusiya quruluşunun müdafiəsi zamanı şəhid olan hərbi qulluqçuların ruhu bir dəqiqəlik sükutla yad edilib.

Tatarməhlə kənd ərazi dairəsi üzrə nümayəndə çıxış edərək, Mirzəqurbanlı kəndi haqqında görüş iştirakçılarına geniş məlumat verib.

Çıxışçılar “Ulu Öndər Heydər Əliyev Azərbaycan xalqının birliyinin və dövlət müstəqilliyinin rəmzidir” mövzusunda iştirakçılara ətraflı məlumat veriblər. Bildirilib ki, Ulu Öndər Heydər Əliyev təkcə güclü dövlət rəhbəri deyil, eyni zamanda Azərbaycan xalqının milli birliyinin və dövlət müstəqilliyinin rəmzidir. Ulu Öndər Azərbaycanın ən çətin dövrlərində xalqın iradəsinə arxalanaraq ölkəmizi parçalanmadan, daxili çəkişmələrdən və xarici təhdidlərdən qorudu. Məhz onun uzaqgörən siyasəti nəticəsində Azərbaycan müstəqil dövlət kimi formalaşdı, sabitlik və inkişaf yoluna qədəm qoyması haqqında məlumat veriblər.

Neftçala Rayon İcra Hakimiyyətinin başçısı Mirhəsən Seyidov çıxışında bildirib ki,  Ümumilli Lider Heydər Əliyev öz əməlləri ilə təkcə Azərbaycan tarixinə deyil, həm də dünya siyasi tarixində silinməz iz qoymuş şəxsiyyətdir. Ulu Öndər Azərbaycan xalqının milli kimliyini qoruyub saxlayan, ölkəmizin müstəqilliyini möhkəmləndirən, onu beynəlxalq aləmdə tanıdan və qüdrətli dövlətə çevirən müdrik lider olub. Məhz bu səbəbdəndir ki, Ulu Öndər Heydər Əliyev yalnız bir dövrün siyasi rəhbəri deyil, Azərbaycan xalqının birliyinin və dövlət müstəqilliyinin əbədi rəmzi kimi tarixə həkk olunub. Ulu Öndər Heydər Əliyevin siyasi irsi və strateji xətti Prezident cənab İlham Əliyevin rəhbərliyi ilə uğurla davam etdirilir. Azərbaycanın bütün sahələrdə qazandığı uğurlar, xüsusilə ərazi bütövlüyümüzün bərpası, tarixi ədalətin bərqərar olunması, beynəlxalq aləmdə artan nüfuzumuz Ulu Öndər Heydər Əliyev siyasətinin təntənəsidir. RİH-in başçısı qeyd edib ki, Neftçala rayonunda da Ulu Öndərin ideyaları daim rəhbər tutulur. Rayonda sosial-iqtisadi inkişaf təmin olunur, vətəndaş rifahı yüksəlir, dövlət proqramları uğurla icra edilir. Biz bu yolla irəliləyərək Heydər Əliyevin ideyalarına və əziz xatirəsinə sadiqliyimizi əməlimizlə nümayiş etdiririk.

RİH-in başçısı, Zəfərlə yekunlaşan 44 günlük Vətən müharibəsindən sonra bölgədə yaranan yeni geosiyasi reallıqlar fonunda Müzəffər Ali Baş Komandan İlham Əliyevin tarixi ədalətin bərpa edilməsi konsepsiyasının davamının məcburi köçkünlərin və qaçqınların Böyük Qayıdışını təmin etmək olduğunu bildirib. O, həmçinin Azərbaycan xalqının milli-mənəvi dəyərlərini və haqqını bərpa etmək missiyasının önəmindən danışıb. Müzəffər Ali Baş Komandan cənab İlham Əliyevin Qərbi Azərbaycan İcmasının üzvləri ilə görüşdə bununla bağlı ciddi tapşırıqlar verdiyini vurğulayıb. Həmçinin, Azərbaycan xalqının haqqının bərpa olunması və Qərbi Azərbaycan İcmasının hüquqlarının beynəlxalq səviyyədə tanıdılması istiqamətində ölkə rəhbərinin sərgilədiyi mövqeyin tarixçilər və hüquqşünaslar üçün ciddi vəzifələr qoyduğunu qeyd edib.

Neftçala RİH-in başçısı, Neftçala rayonunda həyata keçirilən yenidənqurma işləri barədə görüş iştirakçılarına məlumat verib.

Səyyar qəbul zamanı vətəndaşlar, kənddaxili yolların təmiri, içməli su və suvarma ilə əlaqədar yaranan çətinlik, elektrik təchizatının yenilənməsi və digər məsələlər üzrə müraciətlərini irəli sürüblər. Vətəndaşların müraciətləri ayrı-ayrılıqda dinlənilib, məsələlər müzakirə edilib və həll olunması üçün aidiyyəti üzrə tapşırıqlar verilib.

Vətəndaşlar göstərilən yüksək diqqət və qayğıya, həmçinin rayon ərazisində aparılan abadlıq-quruculuq işlərinə görə Azərbaycan Respublikasının Prezidenti cənab İlham Əliyev və Birinci vitse-prezident Mehriban xanım Əliyevaya minnətdarlıqlarını ifadə ediblər.
Məlumat üçün bildiririk ki, vətəndaş məmnunluğunu artırmaq və xidmət keyfiyyətinin yaxşılaşdırılmasını təmin etmək məqsədilə vətəndaşlar Neftçala Rayon İcra Hakimiyyəti ilə həm onlayn, həm də yerində görüşlər üçün yaradılan "Rəqəmsal İcra Hakimiyyəti" https://rih.gov.az portalına daxil olaraq müraciət edə bilərlər.