Tarixə nəzər saldıqda Çin və Azərbaycan xalqları arasında dostluq münasibətlərinin böyük tarixə malik olduğunu görərik.

Hazırda dünyada iqtisadi cəhətdən böyük qüdrətə malik olan Çin Xalq Respublikası böyük tarixi ənənələrə sadiq qalaraq əlaqələrini təkcə yerləşdiyi regionda yerləşən ölkələrlə məhdudlaşdırmayaraq, xüsusilə yerləşdiyi materikinin ölkələri ilə hərtərəfli əməkdaşlığa maraqlı olduğunu əməli surətdə bəyan edir. Bu mənada Çin qarşılıqlı iqtisadi əlaqələrin qurulmasına yönəlmiş “Kəmər və yol” adlı yeni iqtisadi inkişaf strategiyası elan edib. 

Qeyd edək ki, strategiya iki əsas inkişaf istiqamətini nəzərdə tutur: “İpək Yolu İqtisadi Kəməri” və “Dəniz İpək Yolu”. Burada söhbət malların Şərqdən Qərbə güzəştli şərtlərlə birbaşa daşınması üçün ticarət dəhlizinin yaradılmasından gedir. Təsadüfi deyil ki, Azərbaycan Çinin irəli sürdüyü “Kəmər və yol” təşəbbüsünə Qafqaz regionunda dəstək verən ilk ölkə olmuşdur. Əlbəttə ki, rəsmi Pekin tranzit üçün Azərbaycan ərazisini seçərkən bir çox məqamı analiz edib. Layihənin əsasən dəmir yolu ilə reallaşacağını nəzərə alaraq Ölkəmizin bu sahədə olan potensialı önə çıxır. Bu faktdır ki, Azərbaycanın dəmir yolları səmərəliliyinə görə dünyada ilk yerlərdən birini tutur. Ölkə başçısı cənab İlham Əliyev tərəfindən bu sahənin inkişafına böyük diqqət yetirilir. Bu gün ölkəmizdə dəmir yolu nəqliyyatının inkişafı və ümumilikdə milli iqtisadiyyatın gücləndirilməsi istiqamətində böyük siyasət yürüdülür.

Möhtərəm Prezident cənab İlham Əliyev Çin Xalq Respublikasına dövlət səfəri ərəfəsində bu ölkənin nüfuzlu Sinxua agentliyinə müsahibə verərək, Azərbaycan-Çin əlaqələrinin bütün spektrləri ilə yanaşı hazırda qeyd etdiyimiz məsələyə də aydın izah verdi. Tarixə nəzər saldıqda Çin və Azərbaycan xalqları arasında dostluq münasibətlərinin böyük tarixə malik olduğunu görərik. Yüzilliklər ərzində xalqlarımız bir-biri ilə ticarət əlaqələri qurmuş, bu münasibətlər dostluq səviyyəsinə ucalmışdır. Əminliklə deyə bilərik ki, Azərbaycan hazırda dünyanın ən böyük iqtisadiyyatlarından birinə malik Çinlə əlaqələrini genişləndirməklə gələcəkdə daha böyük iqtisadi və maliyyə üstünlükləri əldə edəcəkdir. 

Ziyafət Hüseynov;
Neftçala rayonu, müəllim