Əli Kərim adına Sumqayıt şəhər Poeziya evində Azərbaycan Respublikası Elm və Təhsil Nazirliyinin Təhsildə İnkişaf və İnnovasiyalar üzrə Qrant müsabiqəsində qalib olmuş "HƏR AN üçün bacarıqlar - fərdi təhsildə Finlandiya modeli" layihəsinin bağlanış tədbiri həyata keçirilib.

Liderxeber.az xəbər verir ki, tədbir canlarını vətənin azadlığı və suverenliyi yolunda qurban vermiş Vətən müharibəsi şəhidlərinin əziz xatirəsinin bir dəqiqəlik sükutla yad edilməsi və Azərbaycan Respublikasının Dövlət Himninin səslənməsi ilə başlanıb. Tədbiri giriş sözü ilə başlayan layihə rəhbəri Sumqayıt şəhər Evdə Fərdi Təhsil məktəbinin Azərbaycan dili və ədəbiyyat müəllimi Xəyalə Maarifqızı Elm və Təhsil Nazirliyinin hər il elan etdiyi qrant müsabiqələrin önəmindən danışıb. Layihə rəhbərinin nitqinə əsasən, bu qrant müsabiqələrin əsas məqsədi ümumtəhsil məktəbləri, eləcə də təhsilverənlər arasında sağlam rəqabət, innovativ fəaliyyətləri stimullaşdırmaqdan ibarətdir. Qalib olmuş layihənin əsas məqsədini vurğulayan layihə rəhbəri qeyd edib ki, layihə fərdi təhsilə cəlb olunmuş şagirdlərlə birbaşa çalışan müəllimlərə keçirilən ümumilikdə 24 saat olmaqla Finlandiya təhsil sistemi modelinə uyğun təlimlərdən ibarətdir. Təlimlər şagirdlərin gələcək həyatları üçün əhəmiyyətli olan həyati bacarıqları, sağlam rəqabət düşüncəsini, şəxsi rifah, biznes və maliyyə bacarıqlarını, situasiyalardan öyrənmə kimi bacarıqları formalaşdırır.

Layihə eksperti Aliyə Əhmədova, layihə təlimçisi Xəyalə Quliyeva çıxışlarında bu qrant müsabiqələrin Azərbaycan təhsilinə olan əhəmiyyətindən danışıb, bundan sonra da innovativ və yaradıcı ideyaya malik layihələr təqdim edən təhsilverənlərin aşkarlanması, onlara öz layihələrini reallaşdırmağa şərait yaradılacağını qeyd ediblər. 

Tədbirin sonunda layihədə iştirak edən müəllimlərə sertifikatlar verilib, xatirə şəkilləri çəkildirilib.