Türkiyəli müğənni “Güllü”nün (Gül Tut) ölümü ilə bağlı aparılan istintaq çərçivəsində təqsirləndirilən Sultan Nur Ulunun yeni ifadələri üzə çıxıb.

Liderxeber.az-ın məlumatına görə, onun yeni açıqlamaları ictimaiyyətə təqdim edilib.

Yalovada “Güllü”nün ölümü ilə bağlı “qəsdən yaxın qohumu öldürmə” ittihamı ilə saxlanılan qızı Tuğyan Ülkəm Gültər həbs edilib.

Hadisə geniş rezonans doğurduğu bir vaxtda istintaq çərçivəsində Sultan Nur Ulu ifadəsində bunları deyib:

“O gün Tuğyanla birlikdə çölə çıxdıq. İşlərimizi görüb evə qayıtdıq. Güllü ana bizə yemək sifariş etdi.

Televizoru açdıq, film izlədik. Tuğyan Kervanla görüntülü danışırdı, aralarında mübahisə vardı. Güllü ana buna əsəbiləşdi və “filmi məhv etdiniz” dedi. Sonra musiqi açdıq, rəqs etdik.

Tuğyanla tez-tez olduğu kimi, video çəkdik. Daha sonra yatmaq üçün kiçik otağa keçdik. Tuğyan yenidən mətbəxə getdi, Güllü ana ilə pırasa yeməyi yedi.

Bir-birimizin saçlarını hördük. Tuğyan məndən “roman” musiqisi qoymağımı istədi.

Güllü ana tualetə getdi. Tualetdən çıxarkən Tuğyan “Malkata” mahnısını qoymağımı istədi. Mən mahnını öz telefonumdan açdım. Güllü ana “bu nədir?” deyərək otağa girdi.

Rəqs etməyə başladı və məndən də oynamağımı istədi. Mən bacarmadığımı dedim. Sonra Güllü ana pəncərəyə tərəf getdi.

Tuğyan Güllü anaya yaxın, yatağın kənarında oturmuşdu. Güllü ana çölə baxarkən Tuğyan ayağa qalxıb onu ombasının altından qaldıraraq aşağı atdı. Mənə “qaç” dedi.

Tuğyandan çox qorxurdum. Bu cinayəti mənim üzərimə atacağını düşündüm. “Anasına bunu edən mənə nələr etməz?” deyə düşündüyüm üçün susdum. Tuğyanın bu cinayəti törətdiyini hadisədən qısa müddət sonra vəkil Burçeyə dedim”.

Tuğyan Ülkəm Gültər isə prokurorluqda verdiyi ifadədə hadisə günündən belə bəhs edib:

“Sultanla birlikdə Çınarcıkdakı evə gedəndə anam “Güllü” evdə idi. Otaqda oturub söhbət etdikdən sonra anam duş qəbul etdi. Biz Sultanla yemək sifariş verib yedik. Daha sonra film izləməyə qərar verdik. Film üçün anam məzə hazırladı və şərab aldı. Daha əvvəl alkoqol istifadə edirdi, amma şərabı yeni içməyə başlamışdı. Anam təxminən 3,5 şüşə şərab içdi.

Film izləyərkən bir ara otağıma keçib keçmiş nişanlım Kervanla təxminən 20 dəqiqə görüntülü danışdım. Salona qayıdanda Sultanla anam filmi izləməyə davam edirdilər. Bir müddət sonra filmi bağladıq və musiqi açdıq.

Üçümüz musiqi sədaları altında əyləndik. Sonra Sultanla otağa keçdik. Mən otaqda Kervan və Çiğdemlə görüntülü danışırdım, Sultan yanımda oturmuşdu. Bir-iki dəfə salona gedib-gəldim. Kervanla danışarkən üzük mövzusu oldu, üzüyü atacağımı dedim. Hamilə qalma ehtimalım vardı, amma anam bunu bilmirdi. Sultana demişdim ki, anamın öyrənəcəyi təqdirdə ya uşağı itirdiyimi deyərəm, ya da abort etdirərəm.

Bu vaxt televizorda musiqi səslənirdi. Biz otaqda idik. Tam əmin olmasam da, qapının bağlı olduğunu xatırlayıram. Sultanla birlikdə otaqda mənim telefonumda musiqi qoyduq.

Sultandan “Malkata” mahnısını açmasını istədim. O, mahnını mənim telefonumdan açdı. Biz Sultanla “Malkata” oynayarkən anam içəri girdi. Sultanın əlindən tutub onu da oynatmağa çalışdı. Sultan bilmədiyini dedi. Üçümüz otaqda rəqs etməyə başladıq.

Biz qapı ilə qarderobun arasında oynayırdıq. Anamla bir-birimizi qucaqlayıb çimdikləyərdik. “Məni burax” kimi sözlər deyilibsə, bu ona görə olub. Sonra anam musiqinin səsini artırmağımızı istədi. Sultan qarderobun önündə dayanıb üzünə baxırdı, üzündə tikiş izi vardı. Sultan həmin izə baxırdı, mən də yanında oynayırdım.

Daha sonra çox güclü “güm” səsi eşitdim. Pəncərə tərəfə baxanda anamı görmədim və “qaç” deyə qışqıraraq aşağı endim. Yuxarıda otaqda olarkən səsi eşitdim, amma anamı görmədim. Necə yıxıldığını bilmirəm. Birbaşa aşağı qaçdım. Qaçarkən Çiğdemin qapısını döydüm. Aşağı endikdən sonra baş verənləri xatırlamıram. Sonradan ətrafdakılar danışdı, amma deyilənlərin heç birini xatırlamıram”.