Azərbaycan Respublikası Mədəniyyət Nazirliyinin "Öyrədərək öyrənirəm" layihəsi çərçivəsində Akademik Rus Dram Teatrının rejissoru, aktyoru Abdulla Elşadlı Füzuli teatrında ustad dərsləri keçib və quruluş verdiyi M.F.Axundzadənin "Kavakib" tamaşasının ictimai baxışı olub.

İctimai baxışda Mədəniyyət Nazirliyinin İncəsənət və qeyri - maddi mədəni irs şöbəsinin əməkdaşı Günay Hümbətova iştirak edib. 

Tamaşada əsas rolları Emin Abışov, Asif Şirinov, Qorxmaz Qarayev, Sevinc Məmmədova, Əli Hüseynov, Elçin Məmmədov, Zamin Quliyev, Vüsal Həsənov, Qəlbinur Əhmədli, Vüqar İsmayılov və b. ifa edib. Tamaşanın quruluşçu rəssamı Ellinaz Balaşova, musiqi tərtibatçısı Şəms Kazımzadədir.

Mədəniyyət Nazirliyinin təşkilatçılığı ilə 2021-ci ildən həyata keçirilən “Öyrədərək öyrənirəm” ustad dərsləri layihəsi davam edir. Ötən dövrdə layihə çərçivəsində tanınmış incəsənət xadimlərinin iştirakı ilə çoxsaylı ustad dərsləri təşkil olunub.

Tədbirdə “Öyrədərək öyrənirəm” layihəsinin məqsəd və ideyası barədə məlumat verilib, eyni zamanda bu kimi aksiyaların teatr prosesinə inteqrasiya üçün əhəmiyyətli olduğu bildirilib. Bununla yanaşı, layihənin əhəmiyyəti vurğulanıb, təlim və tamaşanın hazırlanma prosesindən bəhs edilib.