Füzuli Dövlət Dram Teatrının baş rejissoru Nicat Mirzəzadə növbəti dəfə Azərbaycan Respublikası Prezidentinin mükafatına layiq görülüb.

Liderxeber.az xəbər verir ki, bu barədə Prezident İlham Əliyev sərəncam imzalayıb. Sərəncama əsasən, səhnə fəaliyyəti ilə bağlı bir qrup aparıcı incəsənət xadimlərinə Azərbaycan Respublikası Prezidentinin mükafatları verilib.

Nicat Mirzəzadə 1991-ci il fevralın 14-ü İmişli rayonunda anadan olub. 2008-ci ildə Azərbaycan Dövlət Mədəniyyət və İncəsənət Universitetinin Dram rejissorluğu fakültəsinə qəbul olunub. 2014-2021-ci illərdə C. Cabbarlı Adına İrəvan Dövlət Azərbaycan Dram teatrında quruluşçu rejissor vəzifəsində fəaliyyət göstərib. İşlədiyi müddətdə C.Cabbarlı Adına İrəvan Dövlət Azərbaycan Dram Teatrı və Mingəçevir Dövlət Dram Teatrında bir çox tamaşalara quruluş verib. Bunlar D. Çizmeli – “Cümhuriyyətin ilk səadası”, Hidayət – İrəvanda xal qalmadı, Hidayət – Ömürdən uzun gecə, Xaqani Əliyev – Molla Nəsrəddin və Kosa, Keçəl və s. Demet Çizmelinin “Cümhuriyyətin ilk sədası” adlı pyesi əsasında quruluş verdiyi tamaşa Türkiyə Cümhuriyyətinin 17 şəhərində tamaşaçılara təqdim olunub. Müxtəlif diplom və mükafatlara layiq görülüb. 2021-ci ildən Füzuli Dövlət Dram Teatrında quruluşçu rejissor, 2024-cü ildən Füzuli Dövlət Dram Teatrının baş rejissorudur. Azərbaycan Yazıçılar Birliyinin üzvüdür. Yazıçılar birliyinin nəzdində fəaliyyət göstərən Dramaturgiya şöbəsində “Səhnə” yaradıcılıq qurumunun məsul katibidir. Gənc yazar olaraq prezident təqaüdünə, TXİ-nin təsis etdiyi “Ümid” mükafatına layiq görülüb. 

Füzuli teatrında işlədiyi müddətdə Səbinə Haqverdiyevanın "Nar şirəsi", Abdulla Elşadlının "Tənhalığın evi, Xəqani Əliyevin "Molla Nəsrəddin", Sevinc Elsevərin "Həyat elə bir oyun..." tamaşalarına quruluş verib.

Füzuli Dövlət Dram Teatrının kollektivi Nicat Mirzəzadəni Azərbaycan Respublikası Prezidentinin mükafatına layiq görülməsi münasibətilə təbrik edir, gələcək işlərində uğurlar arzulayır.